Eldos Smetov pen bapkeri Aqtóbe oblysynda tasqyn kezinde úısiz qalǵan otbasyna bardy
ASTANA. KAZINFORM – Respýblıka kúni qarsańynda dzıýdodan Parıj Olımpıadasynyń chempıony Eldos Smetov pen onyń bapkeri Ǵalymjan Jylgeldıev baspanaly bolǵan aqtóbelikterdiń qýanyshyna ortaqtasty. Olar Qobda aýdanynda tasqyn kezinde úısiz qalǵan otbasyna baryp, sportpen aınalysatyn balalarǵa syılyq tabystady.
Sonymen qatar aýyl turǵyndaryn Respýblıka kúnimen quttyqtady. Sportshy Jibek Joly telearnasyna bergen suqbatynda tasqynnan zardap shekken turǵyndar jańa baspanaǵa ıe bolǵanyna qýanyshty ekenin jetkizdi. Eldos Smetov pen Ǵalymjan Jylgeldıev kóktemgi sý tasqynynnan zardap shekken otbasylardyń úılerine bardy. «Qutty qonaq keldi» dep qarsy alǵan turǵyndardyń qýanyshynda shek bolmady.
«Memleket basshysynyń tapsyrmasymen keremet, záýlim baspanalar salynǵan eken. Sol salynǵan úılerdiń bárin óz kózimmen kórip, turǵyndarmen kezdestik. Tutas, jańa aýyl paıda bolǵan. «Qıyndyqta dalada qaldyrmady» dep turǵyndar raqmetin aıtyp jatyr. Men óte qýanyshtymyn», - dedi E.Smetov.
Batyrlar mekeni atanǵan Qobdada sportshy jastarmen, jasóspirimdermen kezdesti. Mundaǵy maqsat – jastardyń sportqa degen qyzyǵýshylyǵyn oıatý, olarǵa jiger berý. Chempıon aýyl jastaryna aqyl-keńesin aıtyp, jetistikke jetý jolyndaǵy tájirıbesimen bólisti. Birinen soń biri kezekke turǵan bolashaq sportshylardyń suraqtaryna jaýap berdi. Eldos Smetov elimizde buqaralyq sporttyń damýyna den qoıylyp jatqanyn atap ótti.
«Aldymen, barshańyzdy ulttyq merekemiz Respýblıka kúnimen quttyqtaımyn. Egemendiktiń arqasynda elimiz kórkeıip keledi. Olımpıadadan keıin alǵash bolyp Aqtóbe oblysyna kelip qaldym. Sizderdeı sportqa umtylǵan jastardy, jasóspirimderdi kórgenime óte qýanyshtymyn. Myna sport kesheni keremet eken. Barlyq jaǵdaı jasalǵan. Meniń aıtarym, maqsatqa jetý jolynda eńbek, tabandylyq óte mańyzdy. Osy qaǵıdany esten shyǵarmaı, elimizdiń Týyn álemdik arenalarda jelbiretýlerińizge tilektespin», - dedi ol.
Eske salaıyq, Qobda jáne Jaryq aýyldarynda tasqyn kezinde sý astynda qalǵan úılerdiń ornyna jańadan 147 úı salyndy.
