Eldos Smetov: Olımpıadanyń altyn medalin almaı qoımaımyn
NUR-SULTAN. QazAqparat – Qazaqstandyq dzıýdoshy Eldos Smetov JudoCrazy basylymyna óziniń sporttaǵy basty armany týraly aıtty, dep habarlaıdy QazAqparat Sports.kz saıtyna silteme jasap.
— Siz Azııa oıyndarynyń chempıony, álem chempıony jáne Olımpıada oıyndarynyń kúmis júldegeri boldyńyz. Siz úshin Olımpıada altynynyń mańyzy qanshalyqty zor?
— Olımpıada altyny – ár sportshynyń armany. Olımpıada – barlyq jarystyń bıik shyńy. Ázirge Qazaqstanda grek-rım kúresinen 1980 jylǵy Máskeý olımpıadasynda Jaqsylyq Úshkempirov alǵan jalǵyz ǵana altyn Olımpıada medali bar. Biraq bul keńes ýaqytynda bolǵan. Men Qazaqstannyń Olımpıada altynyn jeńip alǵan alǵashqy balýany bolǵym keledi. Áli kúnge deıin altyn júldeniń bolmaǵanyna qapalymyn. «Bizde shyn mánisinde laıyqty sportshylar joq pa?», «Biz buǵan jete almaımyz ba? degen sekildi suraqtar meni mazalaıdy. Sondyqtan da Olımpıada altyny men úshin óte mańyzdy. Ózge jarystarda altyn alý men úshin asa mańyzdy emes. Óz elimniń namysyn qorǵaǵym keledi. Men óz elimniń týy kóterilgenin kórip, Olımpıadada bizdiń ánurandy shyrqaǵym keledi.
— Siz qazir 27 jastasyz. Áli qansha Olımpıadaǵa qatysa alamyn dep oılaısyz ?
— Shyn mánisinde, men mansabymdy 2016 jylǵy Rıo Olımpıadasynan keıin aıaqtaǵym keldi, biraq kúmis medal alyp qaldym. Maǵan tek altyn ǵana kerek. Olımpıadanyń altyn medalin almaı ózimniń jarystaǵy mansabymdy aıaqtamaımyn dep ant berdim. Bul qashan bolatynyn bilmeımin. Eger 40 jasqa deıin kúresýdi jalǵastyrý kerek bolsa, men ony isteımin. Olımpıadanyń altyn medalinsiz men jarys arenasynan ketpeımin.
Eske sala keteıik, Smetov 2016 jylǵy Olımpıada oıyndarynyń kúmis júldegeri, 2015 jylǵy álem chempıony, 2016 jylǵy Azııa jáne 2014 jylǵy Azııa oıyndarynyń chempıony.
