Eldos Smetov Los-Andjeles Olımpıadasyna qatysa ma
ASTANA. KAZINFORM – Dzıýdodan Parıj-2024 Olımpıadasynyń chempıony Eldos Smetov 2028 jyly AQSh-tyń Los-Andjeles qalasynda ótetin kelesi Jazǵy Olımpıada oıyndaryna qatysýdy josparlap otyrǵanyn aıtty, dep habarlaıdy Informsports.kz.
Sportshy kásibı mansabyn aıaqtaý týraly oıynan bas tartyp, sportta qalýdy uıǵarǵan.
Tájirıbeli palýan óziniń basty maqsaty — halyqaralyq arenada elimizdiń namysyn sońyna deıin laıyqty qorǵaý ekenin jetkizdi.
— Tórtinshi Olımpıadaǵa qatysý múmkindigi bar. Osy múmkindikti barynsha paıdalaný úshin kásibı sporttaǵy mansabymdy jalǵastyrýdy jón kórdim. Qazaqta «Altyn shyqqan jerińdi belden qaz» degen sóz bar. Meniń ómirimdegi jáne óz salamdaǵy sol «altyn tapqan jerim» — sport, naqtyraq aıtqanda, dzıýdo. Dzıýdoda bári men qoldanatyn ádis-tásilderge, ıaǵnı olardy bir nemese eki ret sátti oryndaýyma baılanysty bolady. Altyn sol jerde jatyr, men ony tolyqtaı ıelenýim kerek. Maǵan tıesili, maǵan qajetti altyndy alýym shart. Óıtkeni, men oǵan qol jetkizý jolynda altynnan da qundy nárseni — densaýlyǵymdy qurban etip jatyrmyn, — dedi sportshy.
Aıta keteıik, Smetov óz mansabynda úsh Olımpıadaǵa qatysyp, Oıyndardyń júldeler jıyntyǵyn tolyq oryndaǵan: Rıo-2016-da kúmis, Tokıo-2020-da qola, al Parıj-2024 dodasynda el tarıhyndaǵy tuńǵysh altyndy ıelengen bolatyn.
Aıta ketelik dzıýdodan el chempıonatynda kimder top jarǵany týraly jazǵan edik.
