Eldos Smetov Qytaıda ótetin Gran-prı týrnırindegi basty qarsylastaryn bildi
ASTANA. KAZINFORM – Parıj Olımpıadasynyń chempıony Eldos Smetovtiń Qytaıdyń Tsındao qalasynda ótetin Gran-prı týrnırindegi basty qarsylastary frantsııalyq Romen Valade-Pıkar men ızraıldik dzıýdoshy Itshak Ashpıts bolmaq, dep habarlaıdy Sports.kz saıty.
Tsındaodaǵy týrnır Eldos Smetov úshin eki jyldyq úzilisten jáne Parıj Olımpıadasyndaǵy jeńisten keıingi alǵashqy resmı halyqaralyq jarys bolady.
Buǵan deıin ol mamyr aıynyń basynda Astanada ótken Grand Slam týrnırinde «Golden Fight» aıasynda qysqa kórsetilim beldesýin ótkizgen edi.
– Olımpıada chempıony Parıj Olımpıadasynan keıingi eki jyldyq úzilisten soń Qytaıdaǵy Gran-prı týrnırinde tatamıge qaıta oralady. Qazirgi tańda onyń eń myqty qarsylastary Valade-Pıkar men Itshak Ashpıts, – dep habarlaıdy derekkóz.
Romen Valade-Pıkar 60 kelige deıingi salmaq dárejesindegi Frantsııa quramasynyń kóshbasshylarynyń biri sanalady. Ol 2025 jylǵy álem chempıonatynyń kúmis júldegeri jáne 2023 jylǵy Eýropa chempıonatynyń qola júldegeri.
Al Itshak Ashpıts – Izraıl quramasynyń 2028 jylǵy Olımpıada aldyndaǵy bolashaq kóshbasshylarynyń biri sanalatyn 18 jastaǵy sportshy. Onyń basty jetistikteri qatarynda Grand Slam týrnıriniń altyny, 2026 jyly Tbılısıde ótken eresekter arasyndaǵy Eýropa chempıonatynyń qolasy jáne 2023 jylǵy kadetter arasyndaǵy álem chempıonatyndaǵy jeńisi bar.
Dzıýdodan álemdik Gran-prı kezeńi Qytaıdyń Tsındao qalasynda 26-28 maýsym aralyǵynda ótedi.
Halyqaralyq dzıýdo federatsııasy (IJF) Eldos Smetovtiń 60 kelige deıingi salmaq dárejesinde qatysatynyn resmı túrde rastady. Qazaqstandyq sportshy týrnırdi jetinshi nómirli sportshy retinde bastaıdy.
Aıta keteıik, uzaq ýaqyt úzilisten keıin tatamıge qaıta oralǵan Eldos Smetov basty maqsaty eki dúrkin Olımpıada chempıony bolý ekenin aıtty.
