Eldos Smetov: El abyroıy úshin kúrese beremin
TARAZ. KAZINFORM – Parıj Olımpıadasynyń chempıony, dzıýdodan úsh dúrkin Olımpıada júldegeri Eldos Smetov pen dzıýdodan Qazaqstan Respbýlıkasynyń eńbek sińirgen jattyqtyrýshysy, Eldos Smetovtyń jeke bapkeri Ǵalymjan Jylgeldıev Jambyl oblysy óńirlik kommýnıkatsııalar qyzmetiniń alańynda baspasóz brıfıngin ótkizdi.
El úmitin aqtaǵan sportshy aldymen ózine qoldaý bildirgen, asa úlken qurmet kórsetken barsha jankúıerlerge, Jambyl jurtshylyǵyna alǵysyn bildirdi. Munan soń BAQ ókilderi tarapynan qoıylǵan saýaldarǵa jaýap berdi. Jýrnalısterdiń «Memleketten alǵan qarajatty qaıda jumsaısyz?» degen suraǵyna:
«Ár sportshynyń armany – artynan jaqsy bir mektep ashylsa degen oı. Qyzmet jasap, jınaǵan tájirıbeni bóliskenge ne jetsin?! Memleketten ár sportshyǵa ártúrli deńgeıde beriletin qarajat bar. Ár adam óziniń jasap jatqan jumysyna qarajat alady. Ol qarajat aıdyń sońynda túsetin jalaqylaryńyz sııaqty. «Jalaqyńdy qalaı jaratasyń?» dep surasa qalaı jaýap berer edińiz? Bul meniń otbasyma, etken eńbegime, tókken terime, jetken jetistigime berilgen baǵa, tórt jyldyq jalaqym dep oılaımyn», – dedi Eldos Smetov.
Aıta keteıik, memleketten Eldos Smetovke altyn medal alǵany úshin 250 myń AQSh dollary beriledi. Bul teńgemen shaqqanda 117 mln teńge shamasynda.
Sondaı-aq, sportshy aldaǵy ýaqytta sporttyq mansabyn jalǵastyrǵysy keletinin, kelesi Olımpıadaǵa da barýy múmkin ekenin aıtty. Ázirge qyzmetke taǵaıyndalýdy emes, elimizdiń dzıýdo sportyn damytqysy keletindigin jetkizdi.
«2028 jyly 35 jasta bolady ekenmin. Múmkindigim bolsa, el abyroıy úshin nege kúrespeske degen sheshimge kelip jatyrmyz. Biraz ýaqyt demalyp, otbasyma, bala-shaǵama kóńil bólip, sosyn aqyryndap, kımonomyzdy kıip, belimizdi býyp, el namysyn qorǵaý jolynda eńbek ete beremiz», – dedi ol óz sózinde.
Buǵan deıin Eldos Smetovke jerlesteri Lexus 600 kóligi men 5 bólmeli páter syılaǵanyn jazǵan bolatynbyz.
