Eldos Smetov eki dúrkin álem chempıony atana ala ma
ASTANA. QazAqparat - 28 tamyz ben 3 qyrkúıek aralyǵynda Vengrııa astanasy Býdapeshtte dzıýdodan álem chempıonatynyń jalaýy jelbireıdi, dep habarlaıdy QazAqparat tilshisi.
Bási bıik dodada qazaq eliniń de tatamı sheberleri synǵa túsedi. Olardyń qatarynda qazaq eli erekshe úmit artyp otyrǵan balýandardan 60 keli salmaqta Eldos Smetov, 66 kelide Azamat Muqanov 100 keli salmaqta Maksım Rakov bar.
Buǵan deıingi álem chempıonaty 2015 jyly Astana qalasyndaǵy «Alaý» muz aıdyny saraıynda ótkeni barshamyzǵa belgili. Onda 60 kelide E.Smetov dzıýdodan qazaq ulandary arasynan shyqqan tuńǵysh álem chempıony atanǵanyn áli de umyta qoıǵan joqpyz. Onda ol fınalda óziniń jerlesi Rýstam Ibraevpen synǵa túsip, jeńiske jetken bolatyn. Eki otandasymyzdyń bir altyn, bir kúmis júldesimen jalpy komandalyq esepte tórtinshi oryndy jeńip alǵanbyz.
Eldos odan keıin de óziniń bul jetistigin kezdeısoqtyq emes ekenin dáleldedi. Ol 2016 jyly Azııa chempıonatynda altyn alsa, sol jyly Rıo-de-Janeıroda ótken jazǵy Olımpıada oıyndarynda fınalǵa deıin jetip, kúmis júldeger atandy. Endi Eldos Býdapeshtte taǵy bir márte top jarsa, álemniń eki dúrkin chempıony atanbaq.
Azamat Muqanov ta medaldan úmitker sportshylarymyzdyń biri. Ol 2013 jyly Brazılııada ótken Álem chempıonatynda kúmis medal jeńip alyp, mereıimizdi bir kótergen bolatyn. Onyń medali sol chempıonatta Qazaqstan qorjynyna túsken jalǵyz júlde boldy. Bıylǵy birinshilikte qazaq elin taǵy bir qýantady degen úmittemiz.
Endi Maksım Rakovqa kelsek, bul balýanymyz da Olımpıadada joly bolmaı júrgeni bolmasa, qurlyqtyq, álemdik dodalarda el qorjynyn maılap júrgen sportshylarymyzdyń biri. Ol 2009 jyly Rotterdamda ótken Álem chempıonatynda top jardy. Araǵa eki jyl salyp kelesi Álem chempıonatynda fınalǵa deıin súrinbeı jetti. Fınalda reseılik Tagır Haıbýllaevqa ese jiberip, kúmis medalǵa qol jetkizgen edi.
Biz tek álem birinshiliginde júlde alǵan dzıýdoshylarymyzdy qysqasha atap ótip otyrmyz. Qurama sapynda ózge de myqty balýandarymyz jeterlik. Endi álem birinshiligine qatysatyn balýandarymyzdyń esimderin nazarlaryńyzǵa usynsaq. Dúnıejúzilik básekede myna sportshylar óner kórsetedi:
Erler:
Eldos Smetov pen Ǵusman Qyrǵyzbaev - 60 kg
Eldos Jumaqanov pen Azamat Muqanov - 66 kg
Jansaı Smaǵulov - 73 kg
Islam Bozbaev - 90 kg
Maksım Rakov - 100 kg
Erjan Shynkeev - +100 kg
Áıelder:
Galbadrah Otgontsetseg - 48 kg
Sevara Nyshanbaeva men Anna Kazııýlına - 57 kg
Marıan Ýrdabaeva men Dilbar Ómirálıeva - 63 kg
Zere Bektasqyzy - 70 kg
Albına Amangeldıeva men Zarına Raıfova - 78 kg
Gúljan Isanova + 78 kg
Eskerte keteıik, bul tizim jarysqa deıin áli de ózgerýi múmkin.
