Eldos Smetov: Basty maqsatym – eki dúrkin Olımpıada chempıony bolý
ASTANA.KAZINFORM - Parıj-2024 Olımpıadasynyń jeńimpazy Eldos Smetov Olımpıada tuǵyrynyń eń bıik satysyna qaıta kóterilgisi keletinin aıtty.
Tájirıbeli dzıýdoshy qazirgi tańda babyna kelip, tatamıge qaıta oralýǵa daıyndalyp jatqanyn jetkizdi. Bul týraly Ulttyq olımpıadalyq komıtet jazdy.
- Men mansabymdy aıaqtaǵan joqpyn. Parıj-2024 Olımpıadasynan keıin biraz ýaqyt jaraqattarmen kúresip, qalypqa kelý kezeńinen óttim. Qazir jaǵdaıym jaqsy, birtindep babyma kele jatyrmyn. Búgin Astanada ótken Grand Slam aıasynda qazaq halqyna Olımpıada chempıonyna arnalǵan altyn tigilmeni kórsetýdi jón kórdik. Bul – tarıhı tigilme. Buǵan deıin Qazaqstan quramasynda eshkim mundaı belgi taqqan emes. Sondyqtan ony eń aldymen óz jankúıerlerimiz kórsin dep sheshtik. Búgin ózimmen birge balamdy alyp shyqtym. Áke retinde oǵan maqsat qoıa bilýdi, jaýapkershilikti sezinýdi úıretýdegi alǵashqy qadamymdy jasadym dep oılaımyn. Bolashaqta úlken úmit kútemin. Tek óz balamnan ǵana emes, barsha qazaq jastarynyń myqty bolǵanyn qalaımyz. Óıtkeni bizdiń aldymyzda Jaqsylyq Úshkempirovteı ańyz tulǵa ótti. Ol bizden burynǵy býynǵa da, bizge de úlgi boldy. Ókinishke qaraı, búginde aramyzda joq. Sondyqtan da biz sol aǵamyzdyń atyna kir keltirmeý úshin keıingi jastarǵa úlgi bolýymyz kerek dep oılaımyn. Qazir aldaǵy jarystarǵa daıyndalyp jatyrmyn. Biraq jaqyn ýaqytta naqty qaı týrnırde kúresetinim ázirge belgisiz. Óz deńgeıimizdiń qanshalyqty daıyn ekenin tolyq baǵamdap alýymyz qajet. Degenmen Qytaıdyń Tsındao qalasynda ótetin Gran-prı týrnırinde beldesýim múmkin. Naqty sheshim keıinirek jarııalanady. Salmaq dárejesin aýystyrmaımyn. Aldaǵy ýaqytta da 60 kelide kúresemin. Birneshe ǵana jarysqa qatysýymyz múmkin, sondyqtan reıtıngilik upaı kóp beriletin iri týrnırlerde beldesý mańyzdy. Bıyl basty dodalar - Azııa oıyndary men álem chempıonaty. Qaı jarysqa tolyq daıyn bolsam, sol jerde el namysyn qorǵap, kók týdy bıikte jelbiretýge bar kúshimdi salamyn. Jas degen – jaı ǵana san. Áli de qolymnan keledi dep senemin. Qazaq sportynyń tarıhynda jańa beleske jettik. Endi álem tarıhynda da óz izimizdi qaldyrýǵa bolady dep oılaımyn. Múmkin emes nárse joq. Basty maqsatym – eki dúrkin Olımpıada chempıony bolý. Sondaı-aq barlyq jankúıerge qoldaýy úshin alǵys aıtqym keledi. Árqaısyńyzdyń qoldaýlaryńyzdy erekshe baǵalaımyn, - dedi Eldos Smetov.
Aıta keteıik, Smetov Parıj Olımpıadasyndaǵy jeńisinen keıin áli birde-bir resmı jarysqa qatysqan joq.
Qazaqstan dzıýdo quramasy Qazaqstan Barysy Grand Slam jarysyn tarıhı nátıjemen aıaqtaǵanyn jazǵan bolatynbyz.
