Eldos Smetov álemdik Gran-prı týrnıriniń alǵashqy kúninde-aq jeńilip qaldy
ASTANA. QazAqparat - Germanııanyń Dıýsseldorf qalasynda ótip jatqan dzıýdodan álemdik Gran-prı týrnıriniń alǵashqy jarys kúninde Rıo Olımpıadasynyń kúmis júldegeri Eldos Smetov utylyp qaldy, dep habarlaıdy QazAqparat tilshisi.
Jarystyń alǵashqy kúninde erler 60 keli, 66 keli; áıelder 48 keli, 52 keli jáne 57 keli salmaq dárejelerinde ózara baq synady.
60 kelide tatamıge birinshi bolyp shyqqan Baýyrjan Jaýyntaev alǵashqy aınalymda-aq ıspanııalyq qarsylasy Djarıjos Frantsıskoǵa, al osy jarystyń basty favorıti sanalǵan Eldos Smetov brazılııalyq Pelım Fılıpke vazarı upaıymen utyldy.
66 kelide Azamat Muqanov densaýlyǵynyń nasharlaýyna baılanysty beldesýge shyqpaı qaldy. Osy salmaqtaǵy taǵy bir otandasymyz Ǵumar Qyrǵyzbaev birinshi aınalymda AQSh sportshysy Mıranda Aýgýstony eskertý qaǵazynyń azdyǵymen jeńgenimen, ekinshi aınalymda mońǵolııalyq Dovdon Altansýhtan vazarı upaıymen jeńilip, jarystan shyqty.
52 kelide beldesken burymdy balýanymyz Aıkúnim Túıtekova jarysqa irikteý kezeńiniń ekinshi aınalymynda qosylǵanymen, brazılııalyq Valentım Eleýdıspen bolǵan kezdesýde úsh shıdo alyp, jarysty ári qaraı jalǵastyrmady.
Osylaısha, Gran-prı týrnıriniń alǵashqy kúninde qazaqstandyqtar júldesiz qaldy.
Búgin, 25 aqpan kúni erlerden 73 keli, 81 keli áıelderden 63 keli, 70 keli salmaq dárejesindegi dzıýdoshylar arasynda jarys jalǵasady.
Bul salmaqtarda el namysyn Jansaı Smaǵulov (73 keli), Azız Qalqamanuly (81 keli), Qajymuqan Óteýlıev (81 keli), Marıan Ýrdabaeva (63 keli), Janar Qashqyn (70 keli) jáne Dilbár Ómirálıeva (70 keli) qorǵaıdy.
Esterińizge sala ketsek, Dıýsseldorf qalasyndaǵy dzıýdodan Gran-prı týrnıri 24-26 aqpan aralyǵynda ótedi. 50 elden 346 dzıýdoshy kelgen bul jarysqa Qazaqstan Ulttyq quramasynan 17 sportshy qatysyp jatyr.
