Eldos Smetov álem reıtıngindegi kóshbasshy ornyn joǵaltyp aldy
ASTANA. QazAqparat - Eldos Smetov dzıýdodan jańartylǵan jańa álemdik reıtıngte birinshi orynnan tórtinshi orynǵa biraq syrǵydy, dep habarlaıdy QazAqparat tilshisi.
Ótken senbi, jeksenbi kúnderi Frantsııa astanasy Parıjde dzıýdodan maýsymnyń alǵashqy jarysy «Grand Slam» Paris 2017 týrnıri ótken bolatyn. Osy dodadan keıin IJF reıtıngi jańartyldy. Onda 60 keli salmaqta kóshbasshy bolyp turǵan otandasymyz Eldos Smetov birinshi orynnan tórtinshi orynǵa túsip qaldy. Bul salmaqta «Grand Slam» Paris 2017 jarysynyń jeńimpazy japonııalyq Nahısa Takato birinshi orynǵa kóterildi.
66 keli salmaqta buryn tórtinshi orynda turǵan balýanymyz Azamat Muhanov 15-orynnan kórindi. Bul salmaqta koreıalyq balýan An Baýl reıtıngtegi kóshbasshylyqty saqtap qaldy.
73 keli salmaqta qazaq balýandary alǵashqy jırmalyqqa da ilige alǵan joq. Úshinshi orynda turǵan Shoheı Onondy koreıalyq sportshy An Chagrım yǵystyrdy. Atalmysh salmaqtyń úzdigi ázerbaıjandyq Rýstam Orýdjov óz ornyn saqtap qaldy.
81 kelidegi balýandarymyz da TOP-20-ǵa ilige alǵan joq. Kósh basynda japonııalyq Takanorı Nagase tur.
Qazaqstandyq sportshylar 100 kelige deıingi jáne asa aýyr salmaq dárejesinde de úzdikter qataryna kóterile almady. 100 kelige deıingi salmaqta birinshi orynda bolǵan ázerbaıjandyq dzıýdoshy Elmar Gasımov frantsııalyq Sırıl Maremen oryn almasty. Olımpıada jeńimpazy Lýkash Krpalek úzdik úshtikte qalsa, jerlesimiz Maksım Rakov bul qatarda múlde joq. Al asa aýyr salmaqta kósh basynda - frantsııalyq balýan.
