Eldos Saıdalın: Shákirtterimniń kórsetkishine kóńilim tolady

ASTANA. KAZINFORM — Bokstan Qazaqstan áıelder quramasynyń bas bapkeri Eldos Saıdalın Mońǵolııa astanasy Ulanbatyr qalasynda ótip jatqan World Boxing aıasyndaǵy 2026 jylǵy Azııa chempıonatyndaǵy júldeleri sany jóninde pikirin bildirdi.

Qurlyqtyq dodada Nadejda Rıabets (80 keli), Dına Islambekova (80 keliden joǵary) Azııa chempıony atansa, Baqyt Seıdish (70 keli) kúmis júldeger boldy. 

Sondaı-aq Aıgerim Sáttibaeva (48 keli), Valentına Halzova (70 keli) úzdik úshtikti túıindedi.

– Azııa chempıonatynda enshimizge eki altyn buıyrdy. Bul kórsetkishke kóńilim tolyp otyr. Árıne, qatelikterge jol berildi. Eń bastysy, bul aldaǵy jarystarǵa synaq, jattyǵý, tájirıbe retinde erekshelendi. Aldaǵy ýaqytta jibergen qateliktermen oqý-jattyǵý jıyndarynda jumys isteımiz. Ony barlyq bapkermen talqylap, qatelikke jol bermeýge kúsh salamyz. Endigi mejemiz – Azııa oıyndary. Ulttyq qurama sapyndaǵy qyzdar álemniń ár jerinde ótip jatqan kóptegen týrnırde baq synap jatyr. Alda taǵy da oqý-jattyǵý jıyndaryn ótkizemiz. Sol arqyly Azııa oıyndarynda kimderdiń qatysatyny irikteledi, — dedi E.Saıdalın.

Qurlyqtyq dodada endi 10 sáýirde erler quramasynan 5 boksshymyz altyn medaldy sarapqa salady. Olardyń qatarynda Orazbek Asylqulov (60 keli), Tórehan Sabyrhan (70 keli), Sabyrjan Aqqalyqov (75 keli), Nurbek Oralbaı (85 keli), Aıbek Oralbaı (90 keliden joǵary) bar.