Eldos Qospaevtyń aǵasy 12 jylǵa bas bostandyǵynan aıyryldy
ASTANA. KAZINFORM - Astananyń qylmystyq ister jónindegi mamandandyrylǵan aýdanaralyq soty Eldos Qospaevtyń aǵasy Aıbek Qospaevqa qatysty sot úkimin shyǵardy.
Aıbek Qospaev 7 bap boıynsha kináli dep tanyldy:
- uıymdasqan top nemese qylmystyq uıymǵa qatysý;
- reıderlik;
- qylmystyq jolmen alynǵan aqshany jáne (nemese) ózge de múlikti zańdastyrý (jylystatý);
- bótenniń senip tapsyrylǵan múlkin ıemdený nemese jymqyrý;
- zańsyz kásipkerlik, zańsyz banktik, mıkroqarjylandyrý nemese kollektorlyq qyzmet;
- sáıkestendirý jáne (nemese) baqylaý tańbalarynyń kórineý jalǵan quraldaryn ótkizý maqsatynda daıyndaý nemese satyp alý, sol sııaqty qoldan jasaý nemese ótkizý;
- bopsalaý.
Sot ony 12 jylǵa bas bostandyǵynan aıyrdy.
Qospaev sot úkimimen múldem kelispeıtinin málimdedi.
- Eshteńe dáleldengen joq. Bolǵan oqıǵanyń bári oıdan shyǵarylǵan, tapsyryspen jasalǵan is. Men ádildikti izdegenime, biraq taba almaǵanyma senimdimin. Men bul úkimmen úzildi-kesildi kelispeımin, - dedi ol.
Buǵan deıin Astana qalalyq sotynyń sýdıasy Almat Isahan qazaqstandyq kásipkerlerdi uzaq ýaqyt boıy qorqytyp kelgen Qospaevtyń uıymdasqan qylmystyq tobyna qatysty úkim shyǵarǵan bolatyn.
Eldos Qospaev qylmystyq quqyq buzýshylyq jasaǵany úshin kináli dep tanylyp, 10 jyl merzimge alkogol ónimderin satý salasyndaǵy qyzmetpen aınalysý quqyǵynan, 10 jyl merzimge kommertsııalyq uıymdarda basshylyq laýazymdardy atqarý quqyǵynan aıyryla otyryp, múlki tárkilenip, 15 jylǵa bas bostandyǵynan aıyryldy.
Eldostyń aǵasy Aıdos Qospaev múlki tárkilenip, kommertsııalyq uıymdarda basshylyq qyzmet atqarý quqyǵynan aıyrylyp, 12 jylǵa bas bostandyǵynan aıyryldy.
Buǵan deıin Qarjylyq monıtorıng agenttigi Qospaevtyń uıymdasqan qylmystyq tobyna qatysty «AV-Konstrakshn» JShS, «Shyny zaýyty» JShS, «Shalqar 17» JShS, «Bahar-A» JShS jáne basqa da kásiporyndardy reıderlik jolmen basyp alý faktileri boıynsha tergeýdi aıaqtaǵan bolatyn.