Eldiń soltústigin gazdandyrý úshin «Saryarqa» qubyrynyń 2,3-kezeńderi salynady
ASTANA. KAZINFORM — Elimizdiń soltústigin gazdandyrý úshin «Saryarqa» qubyrynyń 2,3-kezeńderi salynbaq. Bul jaıynda Premer-Mınıstr Oljas Bektenovtiń Senat depýtattarynyń saýalyna bergen jaýabynda aıtylǵan.
«Aqmola jáne Soltústik Qazaqstan oblystaryn gazdandyrý úshin „Saryarqa“ magıstraldy gaz qubyrynyń 2,3-kezeńderin (188,5 mlrd teńge) salý josparlanyp otyr. Atalǵan jobalardy júzege asyrý „Beıneý-Bozoı-Shymkent“ magıstarldy gaz qubyrynyń qýatyn ulǵaıtqannan keıin ǵana múmkin bolady, osyǵan baılanysty „Saryarqa“ barlyq kezeńderin jáne „Beıneý-Bozoı-Shymkent“ ekinshi jelisin bir ýaqytta salý kózdeledi», — deıdi Úkimet basshysy jaýabynda.
Premer-Mınıstr jaýabyna qosymsha berilgen anyqtamada BBSh 2-jelisin salý úshin tehnıkalyq-ekonomıkalyq negizdeme ázirlenip jatqany aıtylady.
Qurylysty aıaqtaýdyń boljamdy merzimi — 2026 jyldyń sońy.
«Óz kezeginde soltústik-shyǵys óńirlerdi gazdandyrýdyń merzimderi QR-ny gazdandyrýdyń 2023-2030 jyldarǵa arnalǵan bas shemasynda ony kelesi naqtylaý kezinde eskeriletin bolady. Úkimet soltústik óńirlerdi gazdandyrýdyń balamaly nusqasyn qatar pysyqtap jatqanyn atap ótken jón. Atap aıtqanda, áleýetti ınvestorlarmen gaz qubyrynyń baǵyttaryn, qurylys jáne gaz jetkizý sharttaryn talqylaý boıynsha kelissóz júrip jatyr», — dedi Oljas Bektenov.
