Eldiń shyǵysy men ońtústigindegi sý qoımalarynda sý deńgeıi 80 paıyzdan asqan

ASTANA. KAZINFORM – Sý resýrstary jáne ırrıgatsııa mınıstrliginiń resmı ókili Móldir Ábdýalıeva ortalyq kommýnıkatsııalar qyzmetinde ótip jatqan baspasóz máslıhatynda eldegi sý qoımalarynyń tasqyn maýsymyna daıyndyǵy týraly málimet berdi.

- Jalpy, elimizdiń soltústigindegi iri sý qoımalary orta eseppen 81%-ǵa, ońtústiginde – 83%-ǵa, batysynda – 59%-ǵa, shyǵysynda - 84%-ǵa jáne ortalyǵynda 79%-ǵa toly. Barlyq nysandarda táýlik boıy kezekshilik uıymdastyrylǵan, - dedi ol.

Aıtýnysha, «Qazsýshar» jáne basseındik ınspektsııalardyń mamandary kún saıyn Tasqyn aqparattyq júıesine sý qoımalaryndaǵy sý deńgeıi boıynsha derekterdi engizip otyr.

- Osy jáne basqa da memlekettik organdar usynatyn málimetter negizinde sý tasqynyn modeldeý júrgizilip jatyr, - dedi mınıstrliktiń resmı ókili. 

Buǵan deıin vedomstvo Qazaqstan kórshi eldermen tasqyn qaýpi týraly qalaı málimet almasatynyn túsindirgen bolatyn.