Eldiń shyǵysy men ońtústiginde aptap ystyq saqtalady, batys pen soltústiginde jańbyr jaýady
ASTANA. KAZINFORM – Soltústik-batys tsıklony jáne onymen baılanysty atmosferalyq fronttyń ótýine baılanysty Qazaqstannyń basym bóliginde aýa raıy qubylmaly bolady.
Jańbyr jaýyp, naızaǵaı oınaıdy. Qostanaı oblysynyń jekelegen aýdandarynda, 19–20 shildede Soltústik Qazaqstan jáne Aqmola oblystarynda, 20 shilde kúndiz Batys Qazaqstan men Aqtóbe oblystarynda qatty jańbyr jaýady dep boljanady. Keı jerlerde burshaq túsip, daýyldy jel soǵady, jel kúsheıedi, al ońtústik óńirlerde shańdy daýyl kútiledi.
Tek eldiń ońtústiginde, ońtústik-shyǵysynda jáne 18 shildede ortalyq óńirlerde jaýyn-shashynsyz, kún ashyq bolady.
Jańbyrdyń, ásirese eldiń soltústik-batysy men soltústiginde keı ýaqyttarda qatty jaýýyna baılanysty kúndizgi aýa temperatýrasy +21…+29°S-qa deıin tómendeıdi.
Sonymen qatar, eldiń shyǵysy men ortalyǵynyń basym bóliginde Orta Azııa aýdandarynan keletin ystyq aýa massalarynyń yqpaly saqtalady. Osyǵan baılanysty munda kúndizgi aýa temperatýrasy +35…+39°S-qa deıin jetip, qatty ystyq bolady. Ortalyq jáne shyǵys óńirlerdiń ońtústik bóliginde óte qatty ystyq saqtalyp, aýa temperatýrasy +42°S-qa deıin kóteriledi. Eldiń ońtústik-batysynda +44°S-qa deıin, al ońtústigi men ońtústik-shyǵysynda +45…+48°S-qa deıin aptap ystyq kútiledi.
Aıta ketelik búgin Astana men Almatyda aýa sapasy nasharlaıdy.
