Eldiń otyn balansyn basqarýda tsıfrlyq sheshimder engiziledi
ASTANA. KAZINFORM — Energetıka mınıstrligi munaı ónimderi naryǵyn tsıfrlyq basqarýdy kúsheıtýge kiristi, dep habarlaıdy mınıstrliktiń baspasóz qyzmeti.
QR Energetıka mınıstrligi «QazMunaıGaz» ulttyq kompanııasy» AQ qoldaýymen munaı ónimderi aınalymyn tsıfrlandyrý jónindegi Jol kartasyn iske asyrý máselelerine arnalǵan keńes uıymdastyrdy.
Іs-shara «QazMunaıGaz» alańynda ótip, oǵan QR Premer-Mınıstriniń keńesshisi Ermek Marjyqpaev, Qarjy mınıstrliginiń, sondaı-aq múddeli uıymdardyń ókilderi qatysty.
Keńes barysynda KMG.AIAN JI-assıstentin paıdalana otyryp, munaı ónimderiniń tapshylyǵy men profıtsıtin boljaý quraldaryna erekshe nazar aýdaryldy.
Qatysýshylarǵa munaı ónimderi balansyn qalyptastyrý jáne óńirlik jetkizilimderge taldaý jasaýǵa arnalǵan tsıfrlyq sheshimderdiń múmkindikteri tanystyryldy.
Keńes aıasynda Jol kartasy is-sharalaryn iske asyrýdyń aǵymdaǵy mártebeleri jáne eldiń otyn balansyn basqarýdyń ashyqtyǵy men tıimdiligin arttyrýǵa baǵyttalǵan munaı ónimderi aınalymyn tsıfrlandyrýdyń negizgi baǵyttary qaraldy.
Sondaı-aq aqparattyq júıelerdi ıntegratsııalaý, vedomstvoaralyq ózara is-qımyl jáne salany odan ári tsıfrlyq transformatsııalaýdyń maqsatty kórinisi máselelerine erekshe kóńil bólindi.
— Keńes qorytyndysy boıynsha Jol kartasy is-sharalaryn iske asyrý jáne munaı ónimderi aınalymyn esepke alý men monıtorıngteý júıesindegi tsıfrlyq sheshimderdi damytý jónindegi aldaǵy qadamdar aıqyndaldy. Bul salanyń basqarylýyn arttyrýǵa jáne munaı ónimderiniń ishki naryǵynyń turaqtylyǵyn qamtamasyz etýge múmkindik beredi, — delingen habarlamada.
Budan buryn Energetıka mınıstrliginiń Qoǵamdyq keńesi 107 jobany qaraǵanyn jazǵanbyz.