Eldiń ońtústigindegi oblystarda belgilengen sý lımıti nátıje berdi me
ASTANA. KAZINFORM — Sý resýrstary jáne ırrıgatsııa mınıstrligi resmı saýalymyzǵa joldaǵan jaýabynda ońtústiktegi bes óńirge bekitilgen sý lımıtiniń arqasynda qansha sý únemdelgenin málimdedi.
Esińizge salaıyq, 2026 jylǵy mamyrda sý paıdalaný shegi mynadaı kólemde belgilendi:
- Qyzylorda oblysy — 3,27 mlrd tekshe metr;
- Almaty oblysy — 2,08 mlrd tekshe metr;
- Jetisý oblysy — 1,83 mlrd tekshe metr;
- Jambyl oblysy — 0,9 mlrd tekshe metr;
- Túrkistan oblysy– 3,88 mlrd tekshe metr.
Al osy oblystar boıynsha jalpy kórsetkish — 11,96 mlrd tekshe metr.
Sý paıdalaný shegin bekitýdiń tıimdiligi jóninde naqty málimet 30 qyrkúıekte, sýarý kezeńi aıaqtalǵannan keıin anyqtalady.
— Lımıtter nátıjesinde únemdelgen sýdyń naqty kólemin tek vegetatsııalyq kezeń tolyq aıaqtalǵannan keıin anyqtaýǵa bolady. Sebebi naqty sý únemdeý kólemin esepteý kezinde belgilengen lımıttermen qatar naqty sý alý, sýarý alańy, daqyldardyń qurylymy, gıdrologııalyq jaǵdaı jáne sýarý júıelerindegi shyǵyndar eskeriledi, — delingen habarlamada.
Áıtse de, Sý resýrstary jáne ırrıgatsııa mınıstrligi 2026 jylǵy 10 tamyzdaǵy jaǵdaı boıynsha derekterdi usyndy. 2025 jylmen salystyrǵanda naqty sý tutyný kólemi mynadaı:
- Qyzylorda oblysynda — 88%;
- Almaty oblysynda — 83%;
- Jetisý oblysynda — 68%;
- Jambyl oblysynda — 33%;
- Túrkistan oblysynda — 92%.
Únemdelgen sý qoımalarǵa jınalyp, qosymsha sý qory qalyptasady. Bıyl ondaı oń ózgeris baıqalady. Ońtústik óńirlerde birqatar iri sý qoımalaryndaǵy sý kólemi 2025 jylǵy kórsetkishterden edáýir joǵary. Atap aıtqanda:
- Shardara sý qoımasynda – 1 370 mln tekshe metr, bul 2025 jylmen salystyrǵanda 1 132 mln tekshe metr artyq;
- Tasótkel sý qoımasynda – 229,6 mln tekshe metr, bul byltyrǵydan 113 mln tekshe metr joǵary;
- Teris-Aşybulaq sý qoımasynda – 23,1 mln tekshe metr, ótken jyldan 15,5 mln tekshe metr kóp;
- Qapshaǵaı sý qoımasynda – 14 870 mln tekshe metr, 2025 jyldan 640 mln tekshe metr mol;
- Bartoǵaı sý qoımasynda – 157,4 mln tekshe metr, byltyrǵydan 71,4 mln tekshe metr artyq.
— Osylaısha, kórsetilgen iri sý qoımalarynda ótken jylmen salystyrǵanda edáýir qosymsha sý qorlary qalyptasty, — dep habarlady mınıstrlik.
Aıta keteıik, buǵan deıin Qazaqstanda Sý resýrstarynyń ulttyq aqparattyq júıesi iske qosylǵanyn jazǵanbyz.
