Eldiń ońtústiginde aýa temperatýrasy +44 gradýsqa deıin kóteriledi
ASTANA. KAZINFORM – Qazgıdromet 11–13 tamyzǵa arnalǵan Qazaqstan boıynsha aýa raıy boljamyn jarııalady.
Atmosferalyq frontaldy bólikterdiń áserinen elimizdiń jekelegen aýdandarynda jańbyr jaýyp, naızaǵaı oınaıdy, burshaq jaýýy jáne ekpindi jel soǵýy múmkin.
11 tamyzda soltústikte jáne ońtústik-shyǵystyń taýly aýdandarynda qatty jańbyr jaýýy boljanady. Qazaqstannyń ortalyǵy men ońtústiginde ǵana jaýyn-shashynsyz aýa raıy basym bolady. Respýblıkanyń soltústik-batysynda, soltústiginde jáne shyǵysynda túnde jáne tańerteń tuman kútiledi.
Kúndiz aýa temperatýrasynyń negizgi fony batysta jáne ortalyqta +27...+39°S, Qazaqstannyń soltústik-batysy men soltústiginde +25...+35°S, shyǵysy men ońtústik-shyǵysynda +30...+42°S, ońtústiginde +37...+44°S bolady.
