Eldiń memlekettik qaryzy qanshalyqty qaýipsiz mejede tur
ASTANA. KAZINFORM — Qazaqstannyń memlekettik qaryzy 38,8 trln teńgege nemese JІÓ-niń 20,2 paıyzyna jetti. Osy oraıda Qarjy mınıstri Mádı Takıev memlekettik bıýdjetke túsetin qaryz júktemesin azaıtý boıynsha qabyldanyp jatqan sharalardy atap ótti.
— Qaryz júktemesine toqtalsaq, qazir memlekettik qaryz kólemi 38,8 trln teńgeni nemese jalpy ishki ónimniń 20,2%-yn qurady. Bizde belgilengen shekti kórsetkish bar, ol 32%-ǵa teń. Biz 2030 jylǵa deıingi kezeńdi qamtıtyn stress-test júrgizdik jáne onyń nátıjesi qaryz deńgeıiniń JІÓ-ge shaqqanda 25%-dan aspaıtyny kórsetilgen. Demek, biz bekitilgen parametrler aıasynan shyqpaımyz, — dedi Mádı Takıev Quryltaıda ótken baspasóz máslıhatynda.
Onyń aıtýynsha, bıýdjet tapshylyǵyn azaıtý úshin kiris kózderinen túsetin qarajatty ulǵaıtý qajet.
— Qazirgi ýaqytta osy kirister boıynsha belgilengen jospardy oryndap kelemiz. Byltyrmen salystyrǵanda osy jyldyń alǵashqy toǵyz aıyndaǵy túsimder plıýs 130%-dy qurady. Degenmen, bul áli de jetkiliksiz. Jyl sońyna qaraı jyldyq jospardy tolyq oryndaımyz dep senemin, — dedi mınıstr.
Sonymen qatar ol bıýdjet tapshylyǵy máselesine toqtala kele, ony qazirgi 2,5%-dan 2029 jylǵa qaraı JІÓ-niń 0,4%-yna deıin qysqartý jospary bar ekenin aıtty.
Eske salsaq, byltyr jeltoqsan aıynda Qarjy mınıstri memlekettik qaryz 35 trln teńgege jetkenin aıtty.
