Eldiń keı óńirinde nóser, endi birinde +40°C aptap ystyq bolady
ASTANA. KAZINFORM — Qazgıdromet 4-6 shildege arnalǵan aýa raıy boljamyn jarııalady.
Aldaǵy kúnderi Qazaqstan aýmaǵynda belsendi tsıklon men atmosferalyq fronttyń ótýine baılanysty aýa raıy qubylmaly bolady.
Jańbyr jaýyp, naızaǵaı oınaıdy. Búkil kezeń boıy respýblıkanyń soltústiginde, 4 shildede soltústik-batysta, 4–5 shildede ońtústik-shyǵys pen ortalyqta, 5–6 shildede shyǵysta qatty jańbyr jaýady dep boljanady.
Respýblıka boıynsha jel kúsheıip, burshaq jaýady. Qazaqstannyń ońtústiginde shańdy daýyl boljanady, al respýblıkanyń soltústiginde túngi jáne tańerteńgi ýaqytta tuman túsedi.
Respýblıkanyń basym bóliginde aýa temperatýrasy birtindep joǵarylaıdy. 5–6 shildede kúndiz batys pen ortalyq óńirlerde aýa temperatýrasy +35…+39°C-qa deıin kóterilip, qatty ystyq bolady, ońtústik-batysta +40°C-qa deıin, al soltústik-batysta +35°C-qa deıin jetedi. Shyǵys óńirlerde búkil kezeń boıy +35…+37°C-qa deıingi qatty ystyq saqtalady.
Aıta ketelik búgin elimizdiń basym bóliginde jańbyr, naızaǵaı jáne burshaq kútiledi.
