Eldiń birneshe óńirinde qar aralas jańbyr jaýyp, kóktaıǵaq bolady
ASTANA. KAZINRORM — Túngi jáne tańerteńgi ýaqytta Aqmola, Abaı, Almaty, Pavlodar, Qaraǵandy, Jetisý, Soltústik Qazaqstan jáne Shyǵys Qazaqstan oblystarynda qar aralas jańbyr men qar jaýyp, keı jerlerde kóktaıǵaq bolady. Bul týraly «QazAvtoJol» baspasóz qyzmeti sınoptıkterdiń boljamyna súıenip habarlady.
Ulttyq kompanııa júrgizýshilerge jolda muqııat bolyp, jyldamdyqty asyrmaýǵa jáne kólikter arasyndaǵy qaýipsiz araqashyqtyqty saqtaýǵa keńes berdi. Sonymen birge sapar baǵytyn aldyn ala josparlap, asa qajettilik bolmasa, jolǵa shyqpaǵan jón.
Jol qyzmeti kólik dóńgelekteriniń jaı-kúıine de nazar aýdarýǵa úndedi. Jazǵy shınalarmen kóktaıǵaqta júrý kólikti basqarýdy qıyndatyp, jol-kólik oqıǵasynyń qaýpin arttyrady.
— Jol qyzmeti táýlik boıy jumys isteıdi, sondaı-aq joldardyń jaı-kúıi men aýa raıy týraly ózekti aqparatty 1403 baılanys ortalyǵynan bile alasyz, — delingen habarlamada.
Eske salaıyq, munyń aldynda 22 qazanda Qazaqstannyń qandaı joldarynda shekteý bar ekenin jazǵanbyz.
