Eldiń birligin bekemdep, rýhyn kóteretin mereke - Nurlybek Nálibaev
Respýblıka kúni qarsańynda Baıqońyr qalasyndaǵy úsh kóshege ult rýhyn asqaqtatqan ulylardyń esimi berildi. Bul týraly oblys ákimi Nurlybek Nálibaev N.Bekejanov atyndaǵy oblystyq qazaq mýzykalyq akademııalyq drama teatrynda ótken ulttyq merekege arnalǵan saltanatty is-sharada habarlady, dep jazady Kazinform.
«Respýblıka kúni – birligimizdi bekemdep, yntymaǵymyzdy arttyratyn, halqymyzdyń rýhyn kóterip, eldigimizdi nyǵaıtatyn eń ulyq mereke. Memleket basshysy Qasym-Jomart Kemeluly ótken jyly qaıta jańǵyrǵan Respýblıka kúninde: «Bul – qazaqtyń san ǵasyrlyq memlekettilik dástúri jańǵyrǵan kún. Bul – bostandyq úshin kúresken babalar armany aqıqatqa aınalǵan kún. 1990 jyly 25 qazanda Qazaqstannyń Egemendigi týraly deklaratsııa qabyldandy. Bul qujat Táýelsizdigimizdiń saıası-quqyqtyq negizin qalyptastyrdy. Bir sózben aıtsaq, Deklaratsııa – elimizdiń Táýelsizdik alýyna jol ashqan aqjoltaı qujat», – dep atap ótken bolatyn.
Mereke qarsańynda ataýly kúnniń saıası mánin aıshyqtaıtyn aýqymdy jumystar jasaldy.
"Endi Baıqońyr qalasyndaǵy Avıatsıonnyı kóshesi dańqty áskerı qolbasshy, Keńes Odaǵynyń batyry, jazýshy Baýyrjan Momyshulynyń, Gostınıchnyı proezd kóshesi Keńes Odaǵynyń batyry Álııa Moldaǵulovanyń, Vnýtrıkvartalnyı proezd kóshesi qazaqtyń qaharman qyzy, Keńes Odaǵynyń batyry Mánshúk Mámetovanyń atymen atalady. Barshańyzdy jaǵymdy jańalyqpen quttyqtaımyn», – dedi aımaq basshysy.
Nurlybek Mashbekuly kúni keshe elorda tórinde ótken saltanatty jıynda elimizdegi eń joǵary memlekettik nagrada – «Qazaqstannyń Eńbek Eri» ataǵyn alǵan «Tań» sharýa qojalyǵynyń tóraǵasy Shaǵyrtaev Imamzada Qýanyshbaıulyn quttyqtady. Bul marapattyń bir azamatqa ǵana emes, aımaqtaǵy barsha eńbek adamdaryna, Syr elindegi jasampaz isterge berilgen joǵary baǵa ekenin atap ótti.
Jıynda Qazaqstannyń Eńbek Eri Imamzada Shaǵyrtaev pen «Parasat» ordenimen nagradtalǵan QR Parlamenti Senatynyń depýtaty Aqmaral Álnazarova, QR Prezıdenti janyndaǵy Ulttyq quryltaı múshesi Qylyshbaı Bısenov jerlesterin Respýblıka kúnimen quttyqtady.
Saltanatty is-sharada Qazaqstan Respýblıkasynyń áleýmettik-gýmanıtarlyq damýyndaǵy asa úzdik jetistikteri, belsendi qoǵamdyq qyzmeti, memlekettik jáne qoǵamdyq qyzmettegi sińirgen eńbegi, halyqtar arasyndaǵy dostyq pen yntymaqtastyqty nyǵaıtýǵa qosqan eleýli úlesi úshin birqatar azamatqa memlekettik orden, medal jáne Qazaqstan Halqy Assambleıasynyń marapattary tabystaldy.
Merekelik kesh kontserttik baǵdarlamaǵa ulasty.
Aıta keteıik, Respýblıka kúnin atap ótý aıasynda óńirde mańyzdy, mazmundy is-sharalar uıymdastyrylýda. Búgin Qyzylorda qalasynyń Rámizder alańynda Memlekettik Tý kóterý rásimi ótti, kúni keshe oblys ortalyǵynda «Jaıly mektep» ulttyq jobasymen salynatyn 900 oryndyq bilim oshaǵynyń, jańa jylý elektr ortalyǵynyń irgetasy qalandy.
