Eldiń birqatar óńirinde úsik júredi
ASTANA. KAZINFORM — Aldaǵy kúnderi Qazaqstannyń basym bóliginde aýa raıyn soltústik-batystan kelgen antıtsıklon aıqyndaıdy. Osyǵan baılanysty jaýyn-shashynsyz aýa raıy bolyp, aýa temperatýrasy tómendeıdi.
Búkil kezeńde Qazaqstannyń batysynda, soltústik-batysynda, 27–28 qyrkúıekte soltústiginde, shyǵysynda jáne ońtústik-batysynda jaýyn-shashynsyz aýa raıy kútiledi.
Respýblıkanyń shyǵysynda, ortalyǵynda, ońtústiginde jáne ońtústik-shyǵysynda atmosferalyq fronttardyń ótýine baılanysty jańbyr, naızaǵaı kútiledi. Túngi ýaqytta Almaty oblysynyń taýly aýdandarynda jańbyr jáne qar túrinde jaýyn-shashyn bolýy múmkin.
Túngi jáne tańerteńgi ýaqytta keı jerlerde tuman boljanady. Respýblıka oblystarynyń basym bóliginde jeldiń kúsheıýi, ońtústikte shańdy daýyl kútiledi.
Búkil kezeńde soltústikte, shyǵysta, 27–28 qyrkúıekte elimizdiń soltústik-batysynda jáne ortalyǵynda túngi ýaqytta 1–3°S úsik kútiledi.
