Eldiń birqatar óńirinde burshaq jaýady
ASTANA. KAZINFORM — Qazgıdromet 25–27 tamyzǵa arnalǵan aýa raıy boljamyn jarııalady.
Qazaqstannyń soltústik jáne shyǵys óńirlerine tsıklon men onymen baılanysty atmosferalyq fronttardyń áser etýine baılanysty aýa raıy qubylmaly bolady. Jańbyr jaýyp, naızaǵaı oınaıdy. Keı jerlerde qatty jańbyr jaýyp, burshaq túsip, daýyl bolýy múmkin. Eldiń shyǵys jáne ońtústik-shyǵysyndaǵy taýly aýdandarda 26–27 tamyzda túngi ýaqytta jańbyrdyń arty qar aralas jańbyrǵa ulasýy yqtımal.
Atmosferalyq qysymy joǵary óristiń yqpalynda bolatyn Qazaqstannyń batysy men ońtústiginde jaýyn-shashynsyz, negizinen qurǵaq aýa raıy bolady.
Jaýyn-shashynǵa qaramastan, elimizdiń basym bóliginde aýa temperatýrasynyń joǵarylaýy saqtalady. Jazdyń sońǵy kúnderi negizinen jyly bolady: soltústikte kúndiz aýa temperatýrasy +25…+32 °S, ortalyq jáne ońtústik óńirlerde +25…+35 °S, shyǵysta +16…+24 °S-tan +20…+31 °S-qa deıin joǵarylaıdy.
