Eldiń batysy men soltústiginde aptap ystyq báseńdep, ońtústikte +46 gradýs bolady
ASTANA. KAZINFORM – Qazaqstannyń basym bóliginde sınoptıkalyq jaǵdaı ózgeredi.
Soltústik-batys tsıklony men oǵan baılanysty atmosferalyq fronttardyń ótýine baılanysty respýblıkanyń batysynda, soltústiginde, ortalyǵynda jáne shyǵysynda aýa raıy qubylmaly bolady. Jańbyr jaýyp, naızaǵaı oınaıdy, 16–17 shildede keıbir aýdandarda nóser jańbyr kútiledi. Burshaq jaýýy, daýyldy jeldiń kúsheıýi múmkin.
Jaýyn-shashynnyń áserinen elimizdiń batysynda aptap ystyq birtindep báseńdeıdi: kúndiz aýa temperatýrasy +22…+35°S, soltústikte qysqa merzimdi tómendeý baıqalyp, +21…+36°S bolady. Al respýblıkanyń ortalyǵy men shyǵysynda óte qatty ystyq saqtalyp, aýa temperatýrasy +41°S-qa deıin kóteriledi.
Sonymen qatar respýblıkanyń ońtústiginde, ońtústik-shyǵysynda jáne ońtústik-batysynyń jekelegen aýdandarynda Orta Azııa óńirlerinen keletin ystyq aýa massalarynyń yqpaly saqtalady. Bul óńirlerde jaýyn-shashynsyz aýa raıy kútiledi, tek ońtústik-shyǵystyń taýly aımaqtarynda ǵana ótkinshi jańbyr jaýyp, naızaǵaı bolýy múmkin. Kúndiz aýa temperatýrasy +41…+46°S-qa deıin jetip, klımattyq normadan joǵary bolady.
Aıta ketelik aptap ystyqta Almatyda jedel járdem shaqyrtýy kóbeıdi.
