Eldiń basym bóliginde naızaǵaı oınap, jańbyr jaýady - Qazgıdromet

ASTANA. KAZINFORM – «Qazgıdromet» RMK-sy shildeniń 3-i kúngi kún raıy boljamyn jarııalady.

Kásiporyn taratqan derekterge qaraǵanda, búgin respýblıka aýmaǵynyń basym bóliginiń kún raıyn tsıklon jáne soǵan baılanysty atmosferalyq frontaldy bólikter aıqyndaıdy. Nátıjesinde eldiń basym bóliginde naızaǵaı oınap, jańbyr jaýady, jel kúsheıedi, batysta, soltústikte, shyǵysta burshaq jaýady, soltústikte jáne shyǵysta daýyl bolady. Tek respýblıkamyzdyń ońtústiginde, ońtústik-shyǵysynda, ortalyǵynda kóbinese kún jaýyn-shashynsyz bolady. Túngi jáne tańerteńgi saǵattarda Qazaqstannyń soltústiginde tuman túsedi.

Abaı oblysynyń shyǵysynda, Atyraý oblysynyń ońtústiginde, batysynda, Pavlodar oblysynyń batysynda, Soltústik Qazaqstan, Shyǵys Qazaqstan, Aqtóbe oblystarynyń ońtústiginde, Mańǵystaý oblysynyń batysynda, ońtústiginde, Mańǵystaý oblysynyń batysynda ońtústiginde, ortalyǵynda, Ulytaý oblysynyń ortalyǵynda joǵary órt qaýpi saqtalady.

Almaty, Jambyl, Qyzylorda, Túrkistan, Jetisý oblystarynda, Qaraǵandy, Ulytaý oblystarynyń batysynda, shyǵysynda, ońtústiginde, Aqtóbe oblysynyń ortalyǵynda, Mańǵystaý oblysynyń soltústik-batysynda, Qostanaı oblysynyń ońtústik-batysynda, Abaı oblysynyń ońtústiginde tótenshe órt qaýpi saqtalady.

Osyǵan deıin Pavlodarda dala órtiniń týyndaýyna kináli azamat jazaǵa tartylǵany týraly jazdyq.