Eldiń basym bóliginde naızaǵaı oınap, jańbyr jaýady — Qazgıdromet
ASTANA. KAZINFORM — «Qazgıdromet» RMQ 9 sáýirdegi aýa raıy boljamyn jarııalady.
Qazaqstannyń basym bóliginde atmosferalyq frontaldy júıelerdiń ótýimen turaqsyz aýa raıy saqtalady. Naızaǵaı oınap, jańbyr jaýady.
Eldiń soltústiginde, túnde batysynda, soltústik-batysynda keı ýaqyttarda qatty jańbyr jaýady, elimizdiń soltústik-batysynda qar jaýýy yqtımal. Tek Qazaqstannyń shyǵysynda ańtıtsıklon jotasy áser etip, jaýyn-shashynsyz aýa raıy saqtalady.
Respýblıka boıynsha tuman bolyp, jeldiń kúsheıip, ońtústikte daýyl turyp, ońtústik-shyǵysta burshaq jaýady.
Qyzylorda oblysynyń shyǵysynda, Túrkistan oblysynyń batysynda, soltústiginde, Jambyl oblysynyń soltústik-batysynda, batysynda, Almaty oblysynyń soltústiginde, ońtústiginde, Jetisý oblysynyń soltústiginde, ońtústiginde, Qaraǵandy oblysynyń batysynda, ońtústiginde, Abaı oblysynyń ońtústiginde joǵary órt qaýpi kútiledi.
Sınoptıkter buǵan deıin aldaǵy kúnderi kún sýytatynyn habarlady.
