Eldiń basym bóliginde kún jaýyn-shashyndy bolady

ASTANA. KAZINFORM – «Qazgıdromet» RMK 5 maýsymǵa arnalǵan aýa raıy boljamyn jarııalady.  

El aýmaǵyna tsıklon men oǵan baılanysty atmosferalyq front áser etedi. Bul faktorlar Qazaqstannyń basym bóliginde jańbyr, naızaǵaı, burshaq, soltústikte qatty jaýyn-shashyn jáne jeldiń kúsheıýin týdyrady. Ońtústik pen ońtústik-batysta shańdy daýyl soǵýy múmkin. Tek elimizdiń ońtústiginde jaýyn-shashynsyz aýa raıy saqtalady. Túngi jáne tańerteńgi ýaqytta soltústik pen soltústik-batysta tuman túsýi yqtımal.

Órt qaýpi joǵary aımaqtar:

Joǵary órt qaýpi Mańǵystaý, Aqtóbe, Jambyl, Batys Qazaqstan, Ulytaý oblystarynda; Qaraǵandy oblysynyń batysy, shyǵysy jáne ońtústigi; Aqmola oblysynyń batysy, soltústigi, ortalyǵy men ońtústigi; Atyraý oblysynyń soltústik-batysy men shyǵysy; Qostanaı oblysynyń soltústik-batysy, ońtústik-shyǵysy; Pavlodar oblysynyń soltústik-batysy, ortalyǵy men ońtústik-shyǵysy; Túrkistan oblysynyń ortalyǵy; Almaty oblysy; Soltústik Qazaqstan oblysynyń ońtústigi; Abaı oblysynyń soltústik-batysy, shyǵysy, ońtústik-batysy jáne ortalyǵynda kútiledi.

Asa joǵary (tótenshe) órt qaýpi Qyzylorda, Túrkistan (soltústik, batys, ońtústik, taýly aýdandary), Jambyl (batys, shyǵys, taýly aýdandary), Aqtóbe (batys, ońtústik, ońtústik-shyǵys), Atyraý (ońtústik, soltústik, batys), Almaty (batys, soltústik), Mańǵystaý (batys), Qostanaı (ońtústik) oblystary men Abaı, Ulytaý jáne Jetisý oblystarynyń soltústigi men shyǵysynda saqtalady.