Eldiń astyq eksporty 12,8 mln tonnaǵa jetti
ASTANA. KAZINFORM — Qazaqstan Ózbekstanmen jáne Ortalyq Azııa elderimen yntymaqtastyqty keńeıtýge nıetti. Bul týraly AShM baspasóz qyzmeti habarlady.
Qazaqstan Ózbekstanmen jáne Ortalyq Azııanyń basqa da elderimen syrtqy ekonomıkalyq yntymaqtastyqty odan ári keńeıtýdi kózdeıdi. Bul týraly «Azyq-túlik kelisimshart korporatsııasy» UK» AQ basqarma tóraǵasynyń orynbasary Samat Teńbaev Asia Grains& Oils Conference in Tashkent 2025 halyqaralyq konferentsııasynda sóılegen sózinde málimdedi.
Samat Teńbaev atap ótkendeı, Ózbekstan qazaqstandyq aýyl sharýashylyǵy ónimderiniń ımport kólemi boıynsha jetekshi elderdiń biri.
Qazaqstannyń ishki naryǵynda da, álemdegi sııaqty egis alqaptaryn qaıta bólý úrdisi baıqalady. Máselen, ylǵal kóp qajet etetin daqyldardyń kólemi azaıyp, maıly, burshaq tuqymdas jáne mal azyqtyq daqyldardyń úlesi artýda.
Óndiristi ártaraptandyrý agroónerkásip keshenin damytýdyń 2030 jylǵa deıingi basymdyqtarynyń biri.
Memlekettik baǵdarlama negizinen kúnbaǵys, raps, maıly zyǵyr, maqsary, jasymyq jáne jem-shóp daqyldarynyń paıdasyna monodaqylǵa (bıdaıǵa) táýeldilikti azaıtýǵa baǵyttalǵan.
Bıyl Qazaqstan Ózbekstanǵa jáne Ortalyq Azııanyń basqa elderine maıly daqyldardy, atap aıtqanda kúnbaǵysty jetkizýdi edáýir arttyrdy. Azyq-túlik kelisimshart korporatsııasy otandyq agroóndirýshilermen jáne qaıta óńdeýshilermen birlesip óńirlik naryqty qamtamasyz etý boıynsha áleýetti kúshke ıe bolyp keledi.
Konferentsııaǵa qatysýshylar Aqmola, Jambyl oblystarynda jáne Astana qalasynda iske qosylǵan astyqty tereń óńdeý jobalaryna erekshe qyzyǵýshylyq tanytty. Korporatsııa mamandary isker toptar aldynda jan-jaqty málimet bere otyryp, mańyzdy bastamalardy iske asyrýǵa kómektesýge daıyn ekendikterin jetkizdi.
— Bıyl astyq ónimi boıynsha qolaıly boljamdardy eskere otyryp, bizdiń elimiz eksporttyq áleýetti nyǵaıtýdy, naryqtar aýqymyn keńeıtýdi, áriptestik baılanystardy tereńdetýdi jalǵastyrady, — dep atap ótti Korporatsııa ókili.
Bul baǵytta ulttyq astyq operatory mańyzdy ról atqarady. 2024-2025 jyldary maýsymda atalǵan korporatsııa shetelge 360 myń tonna jáne treıderler arqyly taǵy 453,3 myń tonnany astyq ónimin jiberip, bıdaıdyń iri otandyq eksporttaýshylarynyń birine aınaldy.
Nátıjesinde jalpy respýblıkalyq astyq eksportyndaǵy kompanııanyń úlesi 8,9%-ǵa jetti. Aǵymdaǵy jyldyń jyldyń 8 aıynda Qazaqstan basqa elderge dástúrli ótkizý naryqtaryna (Ortalyq Azııa elderi, Ázirbaıjan, Aýǵanstan, Iran) jáne jańa baǵyttarǵa shamamen 12,8 mln tonna astyq jetkizdi.
Konferentsııa jumysyna Ózbekstan Respýblıkasy Aýyl sharýashylyǵy mınıstrliginiń, AQSh Aýyl sharýashylyǵy mınıstrliginiń (USDA), Reseı jáne Qytaı korporatsııalarynyń, salalyq qaýymdastyqtardyń, sondaı-aq jeke sektordyń ókilderi qatysty.