Eldiń aqyly joldarynda qaı eldiń kólikteri kóp
ASTANA. KAZINFORM – Qazaqstannyń aqyly joldarymen 500 myńnan astam sheteldik kólik ótti.
Qazaqstannyń aqyly joldaryn paıdalanatyn sheteldik kólikter sany artyp keledi. «QazAvtoJol» UK» AQ málimetinshe, 2026 jyldyń basynan beri respýblıkalyq mańyzy bar aqyly joldarmen 503 myńnan astam sheteldik kólik júrgen. Olardyń qatarynda Reseı, Qytaı, Ortalyq Azııa, Kavkaz jáne Eýropa elderiniń avtokólikteri bar.
Eń kóp kólik Reseıden kelgen. Jyl basynan beri Qazaqstannyń aqyly joldaryn 209 myńǵa jýyq reseılik avtokólik paıdalanǵan. Odan keıin Qyrǵyzstan — 98,6 myń, Ózbekstan — 97,1 myń jáne Qytaı — 23,7 myń kólikpen kósh bastap tur.
Ásirese Qytaıdan keletin kólikter sanynyń ósýi baıqalady. 2025 jyly Qazaqstannyń aqyly joldarymen osy eldiń 11,6 myń avtokóligi júrse, 2026 jyly olardyń sany 23,7 myńǵa jetken. Bul Qytaı men Qazaqstan arasyndaǵy avtomobıl qatynasynyń jandanyp kele jatqanyn kórsetedi.
Jyl basynan beri aqyly joldarda sheteldik kólikterdiń 23,6 mıllıonnan astam ótýi tirkelgen. Bul kórsetkish boıynsha Ózbekstan alda tur — 7,4 mln ret. Odan keıin Reseı — 6,1 mln, Qyrǵyzstan — 3,9 mln ret tirkelgen. Atalǵan kórsetkishter jeke avtokólikterdiń sanyn emes, olardyń aqyly joldarmen júrip ótken jaǵdaılaryn bildiredi.
Qazaqstan joldaryn kórshiles memlekettermen qatar Túrkııa, Belarýs, Grýzııa, Armenııa, Mońǵolııa, Polsha, Lıtva, Ońtústik Koreıa jáne basqa da elderdiń kólikteri paıdalanady. Bul elimizdiń Azııa men Eýropany jalǵaıtyn halyqaralyq avtomobıl qatynasyndaǵy mańyzyn kórsetedi.
Sheteldik kólikterdiń kóbeıýi el ekonomıkasyna da qosymsha múmkindik beredi. Halyqaralyq tasymaldyń damýy jol boıyndaǵy janarmaı quıý beketterine, tamaqtaný oryndaryna, qonaqúılerge, tehnıkalyq qyzmet kórsetý ortalyqtaryna jáne logıstıkalyq kásiporyndarǵa suranysty arttyrady. Osylaısha halyqaralyq kólik qatynasy jol boıyndaǵy kásipkerliktiń damýyna da yqpal etedi.
Aıta ketelik aqyly jolda aqshany qalaı únemdeýge bolatyny týraly jazǵan edik.
