Eldik múdde belgili bir etnos nemese áleýmettik toptardyń múddesinen joǵary turýy tıis – Rızzat Tasym
ASTANA. KAZINFORM – Eldik múdde belgili bir etnos nemese áleýmettik toptardyń múddesinen joǵary turýy tıis. Mundaı pikirdi saıasattanýshy Rızzat Tasym bildirdi.
«Ulttyq tatýlyq máselesi Qazaqstan úshin burynǵydan da ózekti. Óıtkeni Qazaqstan áleýmettik-ekonomıkalyq jańǵyrtý men saıası demokratııalandyrýdyń jańa kezeńiniń toǵysynda tur. Búgin biz elder men halyqtar arasyndaǵy qatynastardyń búkil júıesindegi tereń ózgeristerdiń kýási bolyp otyrmyz. Polıarızatsııa tek elder arasynda ǵana emes, adamdar arasynda da kúsheıe tústi. Ulǵaıyp kele jatqan teńsizdik pen qundylyqtar alshaqtyǵy kez kelgen júıege avtorıtarlyq bolsyn, ne demokratııalyq bolsyn ekzıstentsıaldy qaýip týǵyzyp otyr: Óıtkeni ekonomıkalyq jáne áleýmettik aıyrmashylyqtar saıası aıyrmashylyqtarǵa aınalýda. Oǵan qosa, dinı tózimdilikti nyǵaıtýǵa jáne órkenıetter dıalogyn damytýǵa úlken úmit artqan qazirgi álemde, ókinishke oraı, mádenıetaralyq jáne dinaralyq qaıshylyqtar shıelenise tústi. Sondyqtan bul turǵyda etnosaralyq jáne konfessııaaralyq dıalog pen toleranttylyqtyń tıimdi úlgileri óte mańyzdy. Osy kúnge deıin ultaralyq qatynastardy úılestirýdegi qazaqstandyq tájirıbe ózindik nátıje berip keldi. Biraq joǵaryda aıtyp ótken máseleler árdaıym kez kelgen syn-qaterge daıyndyqty talap etedi», - dedi saıasattanýshy agenttik tilshisine bergen pikirinde.
Onyń atap ótýinshe, saıası baǵdardyń jańa júıesinde damýǵa jáne jasampazdyqqa negizdelgen úılesimdi etnosaralyq qatynastar jańasha qalyptasatyny belgili. Osyndaı jaǵdaıda ultty uıystyrý jáne onyń damýy jónindegi kelisim, ózara seriktestik, onyń ár toby úshin tartymdy bolatyn biriktirýshi qundylyqtarǵa degen qajettilik bar. Azamattardyń birligi, jalpyulttyq biregeıligi men etnoáleýmettik tutastyǵy ortaq ıdealdar men qundylyqtar arqyly úılesimdi iske asady.
«Prezıdenttiń búgingi Assambleıa sessııasynda aıtqanyndaı, qazirgi kúrdeli kezeńde eldiń birligi men yntymaǵyn saqtaý – eń basty mindet. Sondyqtan, birtutas jalpyulttyq perspektıvanyń joǵalýyna baılanysty eń úlken áleýmettik-mádenı apat bolmasyn desek, ulttyq birlikti saqtaı otyryp, ulttyń jańa sapasyn qalyptastyrý kerek. Ulttyń jańa sapasy - qoǵamdyq kelisim men ulttyń ál-aýqatynyń negizi bolýy tıis. Al jańa sapa tıisti qundylyqtar arqyly qalyptasady. Jalpyǵa ortaq ol qundylyqtardy Assambleıasynyń búgingi XXXIII sessııasynda sóılegen sózinde Memleket basshysy qaıta qaıtalap ótti: táýelsizdik jáne otanshyldyq, birlik jáne yntymaq, ádildik pen jaýapkershilik, zań jáne tártip, eńbekqorlyq pen kásibılik, jasampazdyq pen jańashyldyq», - dedi Rızzat Tasym.