Eldiń turmysyn qurǵaq sózben emes, naqty ispen kóterý kerek – Prezıdent

NUR-SULTAN. QazAqparat – QR Prezıdenti Qasym-Jomart Toqaev halyqtyń boıynda qandaı qasıettiń bolýy kerektigin aıtty, dep habarlaıdy QazAqparat tilshisi.

QR Prezıdenti Qasym-Jomart Toqaev Qazaqstan ulttyq telearnasyna bergen suhbat barysynda «Jurtymyzdyń qandaı jaqsy qasıetterdi boıǵa sińirgenin qalar edińiz?», -degen saýal qoıyldy.

«Bul týraly men jańa da aıttym. Degenmen, bul – óte mańyzdy másele, sondyqtan qaıtalap aıtaıyn. Biz qoǵamda eńbekqorlyq ıdeıasyn ornyqtyrýymyz kerek. Týrasyn aıtaıyq, bul qazir eń ózekti másele bolyp tur. Azamattarymyz adal eńbekpen tabys tabýdy eń basty orynǵa qoıýy qajet. Baqýatty el bolý bıliktiń jumysyna ǵana emes, ol, eń aldymen, árbir azamattyń eńbegine baılanysty. Eldiń turmysyn qurǵaq sózben emes, naqty ispen kóterý kerek. Bizdiń jastarymyz osyny aıqyn uǵynsa deımin», - dep jaýap berdi Q. Toqaev.

Memleket basshysynyń aıtýynsha, eldegi belgili teris faktorlarǵa qaramastan, tıimdi, paıdaly jumys atqaratyn múmkindikter az emes.

«Jaqsy men jaman týraly uly Abaıdan asyryp eshkim aıta almas. Sondaı-aq oıshyl aqynnyń «talap, eńbek, tereń oı, qanaǵat jáne raqym» degen danalyǵynyń da máni zor. Bul qaǵıda bizge, ásirese osy zamanda aýadaı qajet», - dedi Prezıdent.