Eldiń soltústigine qonys aýdaratyndar jańa tártipte baspanaly bolmaq
ASTANA. QazAqparat - QR Eńbek jáne halyqty áleýmettik qorǵaý mınıstri Mádına Ábilqasymova soltústik óńirlerge qonys aýdarýshylarǵa qoldaý kórsetý sharalary jetildiriletini týraly aıtty, dep habarlaıdy QazAqparat.
«Jumys kúshi jetispeıtin soltústik óńirlerdiń ekonomıkasyn qamtamasyz etý úshin jumys kúshi artyq óńirlerden erikti túrde qonys aýdarýdy yntalandyrý sharalary qabyldanyp jatyr. 2017-2018 jyldary 2,3 myń otbasy nemese 7,8 myń adam qonys aýdardy. Eńbekke qabiletti jastaǵy qonys aýdarýshylardyń 60 paıyzynan astamy jumysqa ornalastyryldy. Sonymen qatar, mınıstrlik tarapynan baǵdarlamanyń iske asyrylý tıimdiligine júrgizilgen monıtorıng onyń tetikterin jetildirý jáne jergilikti atqarýshy organdar tarapynan baqylaýdy kúsheıtý qajet ekenin anyqtady. Máselen, qysqa merzimdi kásiptik kýrstardy aıaqtaǵannan keıin, jumysqa ornalastyrý tolyq qamtamasyz etilmeıdi. Jańa turǵylyqty jerge kóshken kezde turǵyn úımen qamtamasyz etý máselesi týyndaıdy», - dedi mınıstr.
M. Ábilqasymovanyń sózine qaraǵanda, qoldanystaǵy quraldardyń tıimdiligi arttyrý úshin mınıstrlik baǵdarlamaǵa tıisti ózgeristerdi daıyndady.
«Qysqa merzimdi kásiptik oqytý mindetti túrde jumysqa ornalastyrýǵa baǵdarlanatyn bolady. Oqý oryndaryna qoıylatyn talaptar kúsheıtiledi jáne eńbek naryǵyndaǵy suranysqa qaraı mamandyqtar qaıta qaralady. Onlaın oqytý múmkindigi kózdeldi. Aýyldarda ıakorly kooperatsııa boıynsha jańa qural damytyla bastaıdy, ol kredıt alýshylardyń óz ónimin mindetti túrde satýyn qamtamasyz etedi», - dep naqtylady vedomstvo basshysy.
Onyń atap ótýinshe, qonys aýdarýshylardyń máselelerin keshendi túrde sheshý úshin baǵdarlamanyń jáne «Máńgilik el jastary - Indýstrııaǵa!» («Serpin»-avt.) jobasynyń qonys aýdarýshylardy qoldaý quraldary ıntegratsııalanady. Turǵyn úı salý jáne satyp alý arqyly qonys aýdarýshylardy turǵyn úımen qamtamasyz etýdiń jańa tetigi ázirlenýde. Mehanızm Soltústik Qazaqstan oblysynda qanatqaqty aprobatsııadan ótkizile bastady.
«Aǵymdaǵy jylǵy qazanda baǵdarlamaǵa tıisti ózgerister engizý josparlanǵan», - dep túıdi Mádına Ábilqasymova.
