Eldiń segiz óńirinde boranmen arpalys jalǵasýda
ASTANA. QazAqparat - Qutqarý jumystary Shyǵys Qazaqstan, Qostanaı, Pavlodar, Aqtóbe, Aqmola, Qaraǵandy, Atyraý jáne Soltústik Qazaqstan oblystarynda júrgizilýde.
21 aqpanda jáne 22 aqpanǵa qaraǵan túni qutqarýshylar jergilikti atqarýshy organdarmen birge qar qursaýynda qalǵan 550 adamdy qutqardy. Shamamen 280 birlik texnıka qar astynan shyǵaryldy. Olardyń ishinde 600-den astam jolaýshy boldy. Bul týraly QR ІІM TJK baspasóz qyzmeti xabarlady.
Shyǵys Qazaqstan oblysynda Semeı qalasy men Ulan, Kúrshim, Borodýlıxa, Besqaraǵaı aýdandarynda qutqarý jumystary júrgizildi. Nátıjesinde boran saldarynan jolda qar astynda qalǵan 121 kólik arshylyp, 359 adam qaýipsiz jerge kóshirildi.
Qostanaı oblysynda 151 kólik qardan shyǵarylyp, 389 adam qutqarylǵan. Onyń ishinde 7-ýi bala.
Aqmola oblysynda Býrabaı, Zerendi, Jaqsy, Atbasar, Astaraxan, Qorǵaljyn, Eńbekshilder, Bulandy aýdandarynda qutqarý jumystary júrgizilip, 49 texnıka men 168 adam qar qursaýynan shyǵaryldy.
Qaraǵandy oblysynda Buxar Jyraý jáne Ulytaý aýdandarynda 1 adam qutqarylyp, 8 adam evakýatsııalandy. Qutqarýshylar medıtsınalyq kómekke zárý 5 adamdy medıtsınalyq mekemelerge jetkizdi.
Soltústik Qazaqstan oblysynda jergilikti atqarýshy organdardyń kúshimen qardyń astynda qalǵan 122 kólik shyǵaryldy, 274 adam qutqaryldy.
Aqtóbe oblysynda Qarǵaly men Ýil aýdanynda qutqarýshylar boranda jolda qalǵan 15 adamdy qutqaryp aldy. Al Atyraý oblysynda alys jatqan aýyldardan Qyzylqoǵa aýdandyq emxanasyna 2 adam jetkizildi.
Pavlodar oblysynda «Qyzylorda-Pavlodar» tasjolynda qardyń astynda qalǵan 67 kólik qutqarýshylardyń kómegimen shyǵaryldy. Onda 204 adam bolǵan. Olarǵa Shiderti aýylynyń mektebinde ystyq tamaq berildi. «Novosibir-Pavlodar» tasjolynda ishinde 14 jolaýshysy bar avtobýs joldan shyǵyp ketken. Jolaýshylar Pavlodar qalasyna jetkizildi. Japa shekkender joq.
