Eldiń mal azyǵy óndirisine 300 myń tonna tuqym kerek - Erbol Qarashókeev
Bul týraly Úkimet otyrysynda QR Aýyl sharýashylyǵy mınıstriniń mindetin atqarýshy Erbol Qarashókeev málim etti, dep habarlaıdy QazAqparat tilshisi.
«Qazirgi ýaqytta elimizde azyqtyq daqyldar boıynsha tuqym sharýashylyǵynyń 59 sýbektisi bar. Alaıda, olardyń tuqym óndirý múmkindikteri tolyq paıdalanylmaıdy. Ótken jyly aýyl sharýashylyǵy taýaryn óndirýshiler 1 myń tonnadan astam azyqtyq daqyldardyń tuqymyn satyp aldy, degenmen ǵylymı normalar boıynsha eldiń azyq óndirisin tuqymmen tolyq qamtamasyz etý úshin shamamen 300 myń tonna tuqym qajet. Biz eginshilikti ártaraptandyrý, ǵylymı negizdelgen aýyspaly egisti saqtaý protsesi azyqtyq daqyldardyń tuqymyna turaqty suranys týǵyzýy tıis dep josparlap otyrmyz», - dedi E. Qarashókeev.
Sonymen qatar ol paıdalanylatyn jaıylymdyq jerlerdiń ónimdiligin arttyrý jáne olardyń shekaralaryn keńeıtý málesine toqtaldy. Jaıylym aınalymyn saqtaý árbir jer paıdalanýshynyń tikeleı mindeti bolyp sanalady. Bul jerde másele tıisti ádistemeniń joqtyǵynan baqylaý mehanızmine kelip tireledi. Bul qajetti qoldanbaly ǵylymı zertteýler júrgizýdi qajet etedi.
«Paıdalanylatyn jaıylymdardyń shekaralaryn keńeıtý máselelerine keletin bolsaq, munda negizgi problema - olardy sýlandyrý bolyp otyr. Jaıylymdar týraly aıtqanda, olardyń jeke qosalqy sharýashylyqtardy malmen qamtamasyz etý problemasyn aınalyp ótý múmkin emes. Bul problemany sheshýdiń qoldanystaǵy tetikteri bólingen jerlerdiń ne shyǵyny joǵary, ne eldi mekenderden alys ornalasýyna baılanysty qolaısyz ekenin túsiný kerek. Búgingi tańda bul – máseleni sheshýge kedergi keltirip otyrǵan negizgi faktor.
Osy jaǵdaıdan shyǵýdyń bir nusqasyn biz jeke qosalqy sharýashylyqtar kooperatsııasynda kórip otyrmyz. Bul jumysty Úkimettiń Jambyl oblysynyń tájirıbesin keńeıtý jónindegi tapsyrmalaryn oryndaý aıasynda jáne elimizdiń basqa óńirlerindegi kooperatsııa boıynsha qolda bar oń mysaldardy negizge ala otyryp júrgizetin bolamyz», - dedi Erbol Qarashókeev .
Budan buryn habarlanǵandaı, mınıstrlik atalǵan óńirlerdi qoldaýǵa qansha qarajat bólingenin baıandady.
Óńirler arasynda azyq-túlikti belgilengen baǵamen ózara jetkizý jáne zardap shekken sharýashylyqtarǵa shóp shabý úshin 130 myń gektarǵa jýyq shabyndyq jer bólý týraly sharttar men memorandýmdar jasaldy.