«Eldiń qýaty - birliginde» - respýblıkalyq basylymdarǵa sholý

***

Memleket basshysy Nursultan Nazarbaevtyń Almaty oblysyna jumys sapary jaıynda keńinen jazylǵan maqala el gazeti «Egemen Qazaqstannyń» senbilik nómirinde «Eldiń qýaty - birliginde» degen taqyryppen basyldy. Kóktemgi sý tasqynynan zardap shekken Qyzylaǵash aýylynda jańadan salynǵan ǵımarattarmen tanysqannan keıin Elbasy aýyldyń shyǵys jaǵynda tasqynnan opat bolǵan jandarǵa qoıylǵan eskertkish-monýment janynda aýyl ardagerlerimen, jurtshylyqpen kezdesti. Kezdesý barysynda Prezıdent «Qurmetti halaıyq, qadirli jerlester! Búgingi sapardyń mán-jaıyn bilesizder. Qazaqstanda ǵana emes, álemniń ár túkpirinde túrli tabıǵı apattar oryn alyp, qanshama halyq zardap shegip jatqany belgili. Qyzylaǵashtaǵy jaǵdaıdan keıin Úkimetke jedel tapsyrma berip, arnaıy komıssııa qurylyp, úlken jumystardyń tııanaǵy keltirildi. 8 mlrd. teńgeden astam qarjyǵa atqarylǵan jumys nátıjesinde aýyl qaıta túledi. Bul, birinshiden, memleket táýelsizdiginiń arqasy, ekinshiden, onyń kúsh-qýatyn bildirse, úshinshiden, eldiń birligi men yntymaǵynyń nátıjesi dep baǵalaǵan jón. Barsha halyq bir jeńnen qol shyǵaryp, jumylýynyń arqasynda qandaı jumys jasalǵanyn kórdińizder. Sonymen qatar "Nur Otan" partııasynyń bastamasymen ár adam bir kúndik jalaqylaryn aýdarsa, memlekettik kompanııalar qorǵa qomaqty qarjy quıdy. Úkimettiń, oblys ákiminiń, aýdan basshylarynyń meniń tapsyrmamdy oryndaýynyń jáne Tótenshe jaǵdaılar jáne Qorǵanys mınıstrlikteri jaýapkershilikti túsinip, jedel is-áreket etip, tehnıkalardy toptastyrýynyń arqasynda búgin bir aýyl qalpyna keltirilip, jańardy. Bar bolǵany tórt aıdyń ishinde barlyǵy jańadan 467 úı qaıta salyndy», dedi.

«Egemen Qazaqstan» gazetiniń senbilik nómirinde Qazaqstan Respýblıkasynyń Prezıdenti N.Á.Nazarbaevtyń Sport kúnine arnalǵan quttyqtaýy jarııalandy. Memleket basshysynyń quttyqtaýynda «Sport - eldiń mereıin asyryp, abyroıyn tasytatyn sala. Táýelsizdik jyldary el sportshylary halyqaralyq iri jarystarda top jaryp, kók baıraǵymyz asqaqtaı túsýde. Kelesi jyly elimizde qysqy Azııa oıyndary ótedi. Bul Qazaqstan sportynyń álemdik deńgeıde damyǵanyn kórsetedi. Merekelerińiz qutty bolsyn! Denderińizge saýlyq tileımin! Qazaq eliniń sport salasyndaǵy jetistikteri men tabystary arta bersin!», delingen.

***

Semeı - elimizdiń rýhanı ortalyǵy. Bul ólke - keshegi Alash qalasy, ıaǵnı qazaq zııalylaryn Alash ultyn qurýda maqsat-múddesi, oı-armany toǵysqan jer. «Alash aınasy» gazetiniń baıan etýinshe, Alash qalasynda Alash arystary týraly belgi joq kórinedi. «Tarıhqa júginsek, bul qalanyń qazirgi Jańasemeı bóliginde 1917-1918 jyldary «Alash» qozǵalysynyń keńsesi bolǵan. Endeshe, bul qalada búgingi urpaqqa tarıhı taǵlym bolarlyq Alash qaıratkerlerine bir eskertkish belgi ornatylýy tıis edi. Qalanyń ortalyq kósheleriniń birine «Alash arystary» ataýy berilýi kerek edi. Alaıda egemendigimizdi alyp, etek-jeńimizdi jınap, oń-solymyzdy tanyǵaly 20 jylǵa jýyq ýaqyt ótse de, qalanyń ortalyq úlken kósheleri áli kúnge deıin «Internatsıonal», «Lenın» esimderimen atalady. Sonda 70 jyl boıy sanamyzda ústemdik qurǵan quldyq sanadan Táýelsizdik alǵan 20 jylda da aryla almaǵanymyz ba?», dep jazady basylym.

«Alash aınasy» gazetiniń jazýynsha, elimizdiń bilim berý oshaqtarynyń qysqy maýsymǵa daıyndyǵy máz bolmaı shyqty. Aq borany men qytymyr aıazymen este qalǵan ótken qys bilim berý basqarmalaryna sabaq bolmaǵanǵa uqsaıdy. Keshe Astana, Almaty qalalyq jáne oblystyq bilim basqarmalarynyń bastyqtaryn jınaǵan Bilim jáne ǵylym mınıstri Janseıit Túımebaev jańa oqý jylyna daıyndyq barysyna kóńili tolmaıtyndyǵyn bildirgen. Maqalanyń tolyq nusqasyn oqyǵyńyz kelse, basylymnyń senbilik nómirinde jarııalanǵan «Qystyń qamyn jazda oılamaǵan bilim basqarmalary qyzmetinen qýylady» degen taqyrypqa nazar aýdaryńyz.

***

«Qyrǵyzstannyń energetıka mınıstri Osmanbek Artyqbaev Qazaqstanǵa elektr energııasyn burynǵydaı 1,44 som emes, 1,16 sommen eksporttaýǵa sheshim qabyldaǵanyn habarlady. Qyrǵyz mınıstriniń paıymdaýynsha, bul baǵa eki el úshin de eń ońtaıly kórinedi. Sebebi buǵan deıin, árbir kVt/saǵat úshin 3,1 tsent, ıaǵnı 1,44 somnyń aınalasynda bolyp kelgen», dep jazady «Aıqyn» gazeti. Qyrǵyzstan Energetıka mınıstrligi baspasóz qyzmetiniń habarlaýynsha, qazaqstandyq energııa kompanııalaryna jalpy somasy 56,9 mln AQSh dollaryna 1,8 mlrd. kVt/saǵat elektr energııasy satylady. «Elektr stansalary» AAQ elektr energııasyn satý boıynsha konkýrstyq usynystardy qaraý jónindegi sarapshylar komıssııasynyń sheshimine sáıkes 2010 jyly Qazaqstannyń bes kompanııasymen elektr energııasyn jetkizýge shart jasasty.

Almatyda kóp jyldan beri páter kezeginde turǵan múmkindigi shekteýli jandardyń otbasylary keshe úlken qýanyshqa keneldi. Qala ákimi Ahmetjan Esimov jıyrma otbasyǵa arbaǵa tańylǵan múgedekterdiń júrip-turýyna yńǵaıly, arnaıy jaǵdaı jasalǵan úıden páter kilti men jaldaý sharttaryn tapsyrdy. Bul jaǵymdy jańalyqty «Aıqyn» gazeti jarııalap otyr. Áýezov aýdanynyń Ótegen batyr kóshesinde ornalasqan bul bes qabatty ǵımaratta 1-4 bólmeli 25 páter bar. Ol - elimizdegi arnaıy ınfraqurylymy damyǵan, arbamen júrýge yńǵaıly pandýstary men lıftteri bar alǵashqy úı. Bul páterlerge aýdan ákimdikterinde talaı jyldan beri páter kezeginde turǵan almatylyqtar qol jetkizdi. Olardyń arasynda páter kezeginde jıyrma jyldan asa turǵan múmkindigi shekteýli jandar bar. Jalpy, qala boıynsha, 7 myńnan asa múgedek óz baspanasyn kútip júr eken.

***

«Parlament Senatynyń Tóraǵasy Qasym-Jomart Toqaev Saýd Arabııasy Koroldiginiń Qazaqstandaǵy Tótenshe jáne Ókiletti Elshisi Hısham Abdel Ýahhab Zaraany onyń bizdiń elimizdegi qyzmetiniń aıaqtalýyna baılanysty qabyldady», dep jazady «Kazahstanskaıa pravda» gazeti. Hısham Abdel Ýahhab Zaraa Qazaqstannyń ekonomıkalyq jáne syrtqy saıası jetistikteri men halyqaralyq arenadaǵy artyp kele jatqan rolin joǵary baǵalady jáne bizdiń elimizdiń 2011 jyly Islam Konferentsııasy Uıymyna tóraǵalyq etýi tabysty ótetine senim bildirdi. Elshi Saýd Arabııasy ash-Shýra Májilisi (Konsýltatıvtik Keńes) Tóraǵasynyń Er-Rııadqa resmı saparmen kelýge shaqyrýyn Q.Toqaevqa tabys etti. Kezdesý sońynda Q.Toqaev Qazaqstan men Saýd Arabııasy arasyndaǵy ekijaqty qarym-qatynastardy damytýǵa qosqan jeke úlesi úshin dıplomatııalyq mıssııa basshysyna alǵys aıtty jáne kásibı qyzmetinde tabysty bola berýge tilektestigin bildirdi.