Eldiń ishki jalpy ónimi 4,2 protsentke ósken

Ulttyq ekonomıka mınıstri Tımýr Súleımenovtiń habarlaýynsha, bıylǵy jyldyń birinshi jartyjyldyǵynda eldiń ishki jalpy ónimi 4,2 protsentke ósken. El ekonomıkasynyń ahýaly bırjalyq taýarlarǵa baǵanyń turaqtanýy, Qazaqstannyń negizgi saýda seriktesteri elderinde ekonomıkalyq belsendiliktiń artýy, sonymen qatar álemdik ekonomıkanyń ósýi turǵysynan artyp otyr. Aǵymdaǵy jylǵy maýsymda munaı baǵasy barreline 46,9 dollarǵa deıin quldyraýyna qaramastan, óziniń turaqtylyǵyn saqtady. Aǵymdaǵy jylǵy alty aıdyń qorytyndysy boıynsha, ol barreline 52,2 dollar deńgeıinde qalyptasty, bul ótken jylǵy uqsas deńgeımen salystyrǵanda úshten bir ese joǵary. Atap óterligi, barlyq negizgi metaldarǵa baǵanyń ósýi baıqalady.

Ulttyq ekonomıka mınıstri jalpy alǵanda, syrtqy faktorlardyń Qazaqstan ekonomıkasyna jaǵymdy áserin jáne ekonomıkamyzdyń ishki damý parametrleriniń birte-birte turaqtanýyn atap ótti. Esepti kezeńde ónerkásipte 7,8%-ke, aýyl sharýashylyǵy ónimderiniń óndirisinde 3,1%-ke ósim baıqalǵan. Qurylys jumystarynyń kólemi 5,9%-ke artyp, turǵyn úılerdi paıdalanýǵa berý kólemi 11%-ke ulǵaıdy. Óndiristik sektormen qatar, qyzmet kórsetý salasy men bólshek saýdada da ósim boı kórsetti.

Elimizdiń qarjy naryǵynda turaqty jaǵdaı saqtalyp otyrǵandyǵyna toqtalǵan mınıstr, eldiń halyqaralyq qory aǵymdaǵy jylǵy 1 shildedegi jaǵdaı boıynsha, Ulttyq qordyń aktıvterin qosa alǵanda, 1,9%-ke artyp, 92,4 mlrd. AQSh dollaryn quraǵanyn jetkizdi. Ol sondaı-aq, jyl basynan beri teńgeniń nyǵaıý áseriniń joıylýy aıasynda ınflıatsııanyń baıaýlaǵanyn aıtty. Máselen, bıylǵy maýsymda jyldyq ınflıatsııa 9,8 protsenttik tarmaqqa 7,5%-ke deıin tómendegen. Ortasha aılyq jalaqy nomınaldy mánde 1,9%-ke, ıaǵnı, 140,8 myń teńgege deıin ósken. Al jumyssyzdyq deńgeıi 4,9% deńgeıinde saqtaldy. «Birinshi jartyjyldyqta syrtqy jáne ishki damý ahýalynyń jaqsarýy jaǵdaıynda Qazaqstan ekonomıkasy óziniń ósýin jalǵastyrdy. Endi osy ónerkásip óndirisiniń qol jetken qarqynyn ustap turý úshin ekinshi jartyjyldyqta salalar birinshi jartyjyldyqqa qaraǵanda neǵurlym joǵary serpinde ósýi kerek», dedi T.Súleımenov.

Osy rette mınıstr sońǵy 5 jylda ІJÓ-niń 60 protsenti ekinshi jartyjyldyqta ekonomıka belsendiliginiń artýy esebinen qalyptasqanyn aıtty. Máselen, 2016 jyly ІJÓ-niń 1,0 protsentke ósýi kezinde birinshi jartyjyldyqta ósý 0,1 protsentti quraǵan, al ekinshi jartyjyldyqta ekonomıkanyń ósýi 2015 jyldyń osy kezeńimen salystyrǵanda 1,6 protsentke deıin jedeldegen. Sondyqtan aǵymdaǵy jyldyń basynan ekonomıka serpinin saqtaý úshin maýsymdyq faktorlardy esepke ala otyryp, ishki jalpy ónimniń ósýi 3-toqsanda 4,1 protsentten, 4-toqsanda 4,3 protsentten tómen bolmaýy tıis. Osyǵan baılanysty, ulttyq ekonomıka mınıstri memlekettik organdar men ákimdikterdiń negizgi mindeti óndiristiń qol jetkizgen ósý qarqynyn saqtaý, ınflıatsııa deńgeıiniń nysanaly parametrlerin qamtamasyz etý, jańa jumys oryndaryn qurý jáne eldegi áleýmettik turaqtylyqtyń saqtalýy úshin tyǵyz jáne úılestirilgen jumystardy júrgizý bolyp tabylatynyn atap aıtty.

Jıynda birinshi jartyjyldyqtaǵy qarjy salasyndaǵy jaǵdaı týraly Ulttyq bank tóraǵasynyń orynbasary O.Smolıakov, al respýblıkalyq jáne jergilikti bıýdjetterdiń shyǵys jáne kiris bólikteri týraly, aqsha-nesıe saıasatynyń yntalandyrýshy rólin qalypqa keltirý úshin bank sektoryn saýyqtyrý sharalary týraly qarjy mınıstriniń orynbasary B.Sholpanqulov baıandady. Qarjy mınıstri orynbasarynyń aıtýynsha, memlekettik bıýdjettiń kiristeri transfertterdi eseptemegende 3 407,2 mlrd. teńgeni nemese jospar boıynsha 106,8% qurady. Respýblıkalyq bıýdjet boıynsha kiristerdiń oryndalýy 103,8%, jergilikti bıýdjet boıynsha 114,3% qurady.

Premer-mınıstr Baqytjan Saǵyntaev elimizdiń bıylǵy jyldyń birinshi jartyjyldyǵyndaǵy áleýmettik-ekonomıkalyq damý máselelerin qaraý qorytyndysyn shyǵara otyryp, ortalyq jáne jergilikti atqarýshy organdarǵa Memleket basshysynyń ekonomıka ósimin odan ári qamtamasyz etý úshin bergen tapsyrmalaryn sheshý boıynsha júıeli sharalardy jalǵastyrýdy tapsyrdy.