Eldiń ekonomıkalyq, mádenı damýyna úles qosqan nemis etnosynyń ókilderi marapattaldy
ShYMKENT. QazAqparat - Ońtústik Qazaqstan oblysynda nemis etnosynyń mádenıeti kúni ótti. Merekelik shara aıasynda Qazaqstandaǵy nemis halqy tarıhynyń, ádebıeti men mádenıetiniń kórmesi, etnomádenı birlestikterdiń janyndaǵy shyǵarmashylyq ujymdardyń kontserttik baǵdarlamalary usynyldy, dep habarlaıdy QazAqparat tilshisi.
Merekelik sharada oblystyq Qazaqstan halqy Assambleıasy tóraǵasynyń orynbasary Muratáli Qalmuratov quttyqtaý sóz sóılep, nemis etnomádenı birlestiginiń eldegi berekeli birlikti saqtap júrgenin atap ótti. Sondaı-aq memleketimizdiń saıası, ekonomıkalyq jáne mádenı damýyna laıyqty úles qosyp júrgen birqatar azamattarǵa oblys ákiminiń Qurmet gramotasyn tapsyrdy.
Óz kezeginde oblystyq «Vozrojdenıe» nemis etnomádenı birlestiginiń tóraǵasy Iosıf Bahman Elbasynyń sarabdal saıasatynyń arqasynda Qazaqstan búginde barsha etnostardyń qutty shańyraǵyna aınalǵanyn atap ótti. Aıta ketý kerek, búginde Ońtústik Qazaqstan oblysynda 2,5 myńǵa jýyq nemis ulysy ókilderi turady. 1992 jyly óńirimizde «Vozrojdenıe» nemis etnomádenı birlestigi qurylǵan. El birligin bekemdeý, turaqtylyqty saqtaý baǵytynda atqarylǵan is-sharalardyń janynan tabylyp kele jatqan birlestiktiń Tóle bı, Saryaǵash, Saıram aýdandary men Kentaý qalasynda fılıaldary bar. Jastar qanaty, túrli mádenı úıirmeler men jeksenbilik mektepter jumys isteıdi.
