Eldiń bólinbes yntymaǵy osyndaıda bilinedi – jazýshy Marhabat Baıǵut
TÚRKІSTAN. QazAqparat – Qıynshylyqty birigý arqyly ǵana jeńip shyǵatynymyz aıan. Halyqaralyq «Alash» ádebı syılyǵynyń ıegeri, jazýshy Marhabat Baıǵut osyndaı pikirin jetkizdi, dep habarlaıdy QazAqparat.
«El basyna osyndaı qıynshylyq túsken kezde birigý arqyly ǵana jeńip shyǵatynymyz aıan. Ásirese, kásibin dóńgeletip, el ıgiligi jolynda eńbek etip jatqan jeke kásipkerlerdiń osyndaıda jomarttyq tanytýy qýantarlyq jaǵdaı. Elbasy Qazaqstannyń barlyq azamattaryna, onyń ishinde kásip ıelerine erekshe úndeý joldady. Aty jaman aýrýdan halyqty aman alyp shyǵý úshin óz úlesterin qosýǵa shaqyrdy», - dedi ol.
Marhabat Baıǵuttyń aıtýynsha, jany jomarttyqqa jaqyn Túrkistannyń atymtaı azamattary bul úndeýge birden qoldaý bildirgen.
«Arys oqıǵasy kezinde talaıǵa sharapaty tıgen «Túrkistan« qoryna qarajat aýdaryp, aýrýdyń keń taralýynyń aldyn-alýy úshin kómek kórseter kásipkerler shyqty. Onyń ústine barlyq salanyń qyzmetkerleri birkúndik aılyq aqylaryn aýdaryp, úlesterin qosýda. Mine, eldiń birligi, bólinbes yntymaǵy osyndaıda bilinedi. Jumyla kótergen júktiń aýyr bolmaıtyny dáleldep, biz bul qıyndyqty da birlikpen, temirdeı tártippen, joǵary jaýapkershilikpen, talapshyldyqpen, tazalyqpen jeńip shyǵarymyzǵa kámil senemin», - dedi qoǵam qaıratkeri.
