Eldiń batysynda energııa berýde shekteýler bolýy múmkin – Úkimet otyrysy

ASTANA. QazAqparat – «KEGOC» AQ basqarma tóraǵasy Qanysh Moldabaev búgingi Úkimet otyrysynda batys óńirlerdegi energetıkalyq apattyń saldary qalaı joıylyp jatqanyn málim etti, dep habarlaıdy QazAqparat tilshisi.

«Saǵat 9.00-degi jaǵdaı boıynsha Atyraý energııa torabynda shekteý joq. Mańǵystaý energııa torabynda óndiris nysandarynda 65 megavatt kólemde shekteý saqtalyp otyr. Bul shekteýler Mańǵystaý atom energetıka kombınatyndaǵy qýaty 140 megavatt bolatyn №1 bloktyń óshirilýinen týyndaǵan elektr tapshylyǵymen baılanysty.

Karabatan Utility Solutions kásipornyndaǵy qýaty 220 megavatt stansada generatsııa tolyqtaı óshirilgen. Erteń saǵat 12.00-ge deıin iske qosylatyny týraly málimet aıtylyp otyr.

Búgin kúni boıy elektr tutyný kólemi artqan jaǵdaıda Oral - Atyraý - Mańǵystaý baǵytynda qýat tranzıtiniń artyq júktelimin boldyrmaý úshin qosymsha shekteýler engizilýi múmkin», - dedi ol.

Sondaı-aq ol batys aımaqtyń elektr stantsııalarynyń júıelik rettegishterin tekserýdi usyndy.

«KEGOK kompanııasy Batys energetıkalyq aımaqty elektrmen jabdyqtaýdyń ornyqtylyǵyn arttyrý úshin qoldanystaǵy qosalqy stansalardy 220 kılovoltqa keńeıte otyryp, uzyndyǵy 770 shaqyrym bolatyn 220 kılovolttik ekinshi tranzıt qurylysyn jáne 220 kılovolttik qosalqy taratý stansasyn salyp bitiredi. Nátıjesinde tranzıttiń ótkizý qabileti Oral - Atyraý ýchaskesinde 100 megavattan 200 megavatqa deıin, Atyraý - Mańǵystaý ýchaskesinde 50 megavattan 200 megavatqa deıin ulǵaıady», - dedi Qanysh Moldabaev.

Eske salaıyq, keshe keshke Atyraýda birneshe shaǵynaýdanda jaryq sónip qalǵan bolatyn.

Artynsha jergilikti energetıkalyq keshenniń baspasóz qyzmeti elektr qýatynyń óshý sebebin aıtty.

Saǵat 21.30-da Atyraý oblysy ákimdigi jaryqtyń janǵanyn habarlady.

Prezıdent Qasym-Jomart Toqaev Atyraý munaı óńdeý zaýyty men Mańǵystaý atom energetıka kombınatynda týyndaǵan jaǵdaı boıynsha memlekettik komıssııa qurýdy tapsyrdy.