Eldiń basym óńirinde qubylmaly kún raıy saqtalady
NUR-SULTAN. QazAqparat – 12 qazan kúni Soltústik Batys tsıklonnyń ońtústik-shyǵys baǵytqa yǵysýyna baılanysty Qazaqstannyń basym bóliginde qubylmaly kún raıy saqtalady.
Keı óńirlerde naızaǵaı oınap, jańbyr jaýady, soltústik pen ortalyqta jaýyn-shashyn (jańbyr, jylbysqy qar) kútiledi. Ońtústik pen soltústik-shyǵysta senbi jaýyn-shashynsyz ótedi. Respýblıka boıynsha jekelegen óńirlerde tuman, ekpindi jel, burshaq boljanady. Ońtústikte túnde úsik júredi, dep habarlaıdy QazAqparat.
«Qazgıdromet» RMK málimetinshe, túnde Túrkistan, Qyzylorda, Jambyl oblystarynda 1-3 gradýs úsik kútiledi. Túrkistan, kúndiz Qyzylorda oblystarynda jel 15-20 m/s kúsheıedi. Jambyl oblysynda tuman boljanady.
Almaty oblysynyń keı jerlerinde naızaǵaı, túnde tuman kútiledi. Jeldiń ekpini 15-20 m/s artýy múmkin.
Atyraý oblysynyń jekelegen aýmaqtaryn tuman basyp, kúndiz burshaq jaýýy yqtımal.
Aqmola, Qostanaı, Soltústik Qazaqstan, Pavlodar oblystarynyń keı jerlerinde tuman kútiledi. Túnde Aqmola oblysynda jeldiń jyldamdyǵy 15-20 m/s kúsheıedi.
Batys Qazaqstan oblysynyń keı jerlerinde naızaǵaı, tuman boljanady.
Qaraǵandy oblysynyń keı jerlerinde tuman kútiledi, túnde jáne tańerteń naızaǵaı bolady.
Shyǵys Qazaqstan oblysynda naızaǵaı oınap, jeldiń kúshi 15-20 m/s artady.
Sondaı-aq Túrkistan oblysynyń basym bóliginde, Qyzylorda oblysynyń shyǵysynda, Qaraǵandy oblysynyń batys jáne ońtústik-shyǵys bóliginde, Batys Qazaqstan oblysynyń ońtústik-shyǵysynda, Shyǵys Qazaqstan oblysynyń soltústik-shyǵys bóliginde óte joǵary órt qaýpi saqtalady.
