Eldiń azyq-túlik qaýipsizdigi aýyl sharýashylyǵy jerlerin durys paıdalanýǵa tikeleı táýeldi - QR Jer resýrstary agenttigi
ASTANA. 20 jeltoqsan. QazAqparat /Jasulan Amanbaıuly/ - Arnaıy ınspektsııa 2009 jáne 2010 jyldary jalpy kólemi 2,5 mln. gektar atyrapty alyp jatqan 24 myńnan astam jer telimderiniń paıdalanýsyz qalǵandyǵyn anyqtady.
Bul týraly búgin Astanada Bnews.kz portalynda bolǵan onlaın-konferentsııada QR Jer resýrstaryn basqarý agenttiginiń tóraǵasy Ómirzaq Ózbekov málim etti.
Onyń sózine qaraǵanda, mundaı nemquraıdylyq tutas memlekettiń azyq-túlik qaýipsizdigine nuqsan keltirip otyr.
«2009 jyly aýyl sharýshylyǵy jerlerine qatysty Qaýipsizdik Keńesiniń otyrysy ótken bolatyn. Jer resýrstaryn basqarý agenttigi oblys ákimdikterine jerlerdi qorǵaý baǵytyndaǵy memlekettik qadaǵalaýdy qatańdatý boıynsha birqatar tapsyrmalar berdi. Sebebi eldiń azyq-túlik qaýipsizdigi aýyl sharýashylyǵy jerlerin durys paıdalanýǵa tikeleı táýeldi», - deıdi Ó. Ózbekov.
Onyń keltirgen málimetine sáıkes, 2009-2010 jyldar aralyǵynda jer zańnamasyn buzýdyń 11 myń faktisi anyqtaldy. Onyń jartysynan kóp úlesi memlekettik menshik quqyqtaryn buzýǵa qatysty, ıaǵnı memlekettik jerlerdi zańsyz basyp alý bolsa, zań buzýshylyqtyń ekinshi sanaty - aýyl sharýashylyǵyna arnalǵan jerlerdi tıimdi qoldanbaý nemese maqsatyna saı múldem paıdalanbaý bolyp otyr.
«Ákimdiktermen ótken birlesken sharalardyń barysynda 2009 jáne 2010 jyldary arnaıy ınspektsııa jalpy kólemi 2,5 mln. gektar atyrapty alyp jatqan 24 myńnan astam jer telimderiniń paıdalanylmaǵandyǵyn anyqtady», - dep túıindedi sózin Agenttik basshysy.
