Eldiń atynan Olımpıadaǵa qatysý kerek bolsa, men daıynmyn - Qanat Islam
ASTANA. QazAqparat - Qanat Islam eldiń atynan Olımpıadaǵa qatysý kerek bolsa, daıyn ekenin málimdedi, dep jazady oishogyr.kz.
«Qanat aǵa, kásipqoı boksshylardyń da olımpıadaǵa qatysýyna bolady degen sóz shyqqaly «Qanat Islam barady ma eken?» degen suraqty ár qazaq qoıdy desek artyq aıtqandyq emes. Sebebi bárimiz olımpıadada kók týdy jelbiretkenińizdi kórgimiz keledi. Rıoǵa baryp, el namysyn qorǵaý qanshalyqty múmkin bolyp tur?!» - degen suraqqa bylǵary qolǵap sheberi tómendegideı jaýap berdi.
«Eldiń yqylasyna, qoldaýyna rahmet. Meni izdeıtin qazaǵymnyń baryna shúkir. Eldiń yqylasy jeńiske jetýime senim uıalatyp, serpin beredi. Qazir men AQSh-ta kelesi jattyǵýyma daıyndalyp jatyrmyn. Buıyrtsa jekpe-jek kelesi aıdyń segizine dep josparlanýda. Árıne, men úshin olımpıadanyń orny bólek. AQSh-ta da Kók týdy jelbiretý úshin júrmin ǵoı. Biraq olımpıada oıyndarynda Ánurandy oınatý ol bólek nárse. Ol - bólek qýanysh. Qazir meniń salmaǵymda Danııar Eleýsinov, Jánibek Álimhanuly inilerim óner kórsetip júr. Ekeýi de jaqsy jigitter. Olar boks áleminiń jaryq juldyzyna aınalatynyna senemin. Tilekshimin. Shynymdy aıtsam, sol eki inimniń jolyn keskim kelmeıdi. Árıne, mańdaıǵa jazǵany bolady. Eger, Qanat olımpıadaǵa eldiń atynan sen barýyń kerek dese, men daıynmyn. Bárin tastap barýǵa ázirmin. Bıylǵy doda óte tartysty bolmaq, olımpıadada óner kórsetetin baýyrlaryma tek sáttilik tileımin. Kók týdy jelbiretip, el qorjynyna kóp altyn salady dep senemin», - dedi ol.
Berik SULTAN
