Eldiń ár óńirinen turǵyndar Erlan Turǵymbaevpen jeke kezdesýge keldi
Óziniń máselesin QR Іshki ister mınıstrine jetkizý úshin turǵyndar elimizdiń túkpir-túkpirinen arnaıy kelipti. Áýeli Erlan Turǵymbaev óńirlermen onlaın-baılanysqa shyǵyp, azamattardyń shaǵymdary men saýaldaryn tyńdady. Halyq tarapynan qoıylǵan suraqtardyń jalpy sıpaty týraly QR Іshki ister mınıstrliginiń resmı ókili Nurdildá Oraz aıtyp berdi.
«Búgin «Nur Otan» partııasynyń alańynda mınıstr qarapaıym azamattardy óziniń máselelerimen qabyldap jatyr. Qazirdiń ózinde 50-ge jýyq azamat túrli aımaqtardan ózderiniń saýaldaryn tikeleı qoıýǵa jazylǵan. Buǵan tehnıkalyq múmkindik bar. Suraqtardyń sıpaty árkelki. Máselen, Pavloldar, Almaty oblystarynan qylmystyq isterdi zańsyz qysqartýǵa baılanysty suraq qoıyldy. Tergeýshilerdiń áreketterine kóńili tolmaıtyn adamdar da habarlasyp jatyr. Osy jáne ózge de máseleler boıynsha suraqtar qoıylýda. Dál osy jerde QR Іshki ister mınıstri osydan birneshe aı buryn qarapaıym turǵyndardy qabyldaǵan bolatyn. Ol kezde 40-qa jýyq aryz qaraldy. Onyń 80 paıyzy mınıstrdiń qatań baqylaýynda bolyp, kóptegen azamattar saýaldaryna sheshim tapqan bolatyn. Búgin qoıylǵan suraqtardyń bári solaı qarastyrylady», - deıdi Nurdildá Oraz.
Mınıstrlik ókili qabyldaýǵa jazylǵan adamdardyń keıbiri Іshki ister mınıstrliginiń quzyretine jatpaıtyn saýaldar qoıyp jatqanyn da atady.
«Keıbir azamattardyń prokýratýra, sot salasyna qatysty suraqtardy qoıǵanyn kórdińizder. Olardy sıpatyna qaraı sotqa nemese prokýratýraǵa baǵyttap jatyrmyz. Іshki ister mınıstrligi óziniń quzyreti boıynsha jaýap beredi. Degenmen, búgin qoıylǵan suraqtardyń barlyǵy qatań tekserilip, mınıstrlik qurylymyndaǵy jergilikti organ basshysynyń, tipti bolmasa mınıstrlik basshylyǵynyń nazaryna alynyp, sheshimin tabatyn bolady», - deıdi ol.
Resmı ókil ishki ister salasyna qatysty problemasy bar adamdar «Nur Otan» partııasynyń qabyldaý uıymdastyrýyn kútpeı-aq, óz betimen aryzdanýǵa bolatynyn aıtady.
«Azamattardy qabyldaý protsesi tek «Nur Otan» alańynda ǵana júrgizilmeıtinin aıtqym keledi. Mınıstrdiń óziniń qabyldaýy bar. Ol jylyna 4-5 ret, saýaldar kóp bolǵan jaǵdaıda odan da jıi ótkiziledi. Mınıstrlik basshysynyń bes baǵyt boıynsha orynbasarlary, komıtet jáne departament basshylary bar. Olar dál osyndaı qabyldaýlar ótkizedi. Ár óńirdegi polıtsııa departamentiniń basshylary da jergilikti halyqty jeke máseleleri boıynsha qabyldaıdy. Árbir qabyldaý protsesi mınıstrlik saıtynda kórsetilgen. Kez kelgen qandaı da bir suraǵy bolsa, ol tergeýge qatysty ma, bolmasa krımınaldyq sala boıynsha ma, bolmasa qylmystyq atqarý júıesine shaǵymy bolsa, ózi qýdalaýǵa ushyrasa, qyzmetkerlerdiń jumysyna kóńili tolmasa ishki ister mınıstrliginiń saıtynda kórsetilgen keste boıynsha qabyldaýǵa jazylyp, óz máselelerin sheshe alady», - dep tolyqtyrdy ol.
