Eldiń Áleýmettik kodeksin ázirleý qajet – Toqaev
NUR-SULTAN. QazAqparat – Eldiń Áleýmettik kodeksin ázirleý qajet. Bul týraly búgin Qazaqstan halqyna Joldaýyn jarııa etken QR Prezıdenti Qasym-Jomart Toqaev aıtty, dep habarlaıdy QazAqparat tilshisi.
«Úkimetke eldiń Áleýmettik kodeksin ázirleýdi tapsyramyn. Áleýmettik tólemderdi tsıfrlandyrý boıynsha sharalar qabyldaý qajet. Bul úshin azamattyń tsıfrlyq áleýmettik ámııan engizip, sonymen qatar tıisinshe taýar ótkizetin júıe qurý kerek», - dedi Qazaqstan Prezıdenti.
Memleket basshysynyń atap ótýinshe, qoǵam eńbek qundylyqtaryn qabyldaýyn ózgertýi tıis.
«Jas býynǵa eńbekti baǵalaýdy, ony mártebeli nemese mártebesiz dep bólmeýge úıretý qajet. Ókinishke oraı, jastar bir sátte-aq baıyp shyǵa kelgileri keledi. Mine osydan lotereıalarǵa, stavkalarǵa, býkmekerlik agenttikterge úıir bolyp alǵan», - dedi Qasym-Jomart Toqaev.
