«Eldik tutastyǵymyzdy saqtaýdyń úlken mektebi - kórkem ádebıet» - respýblıkalyq basylymdarǵa sholý

***

Keshe Úkimet úıinde Premer-Mınıstr Kárim Másimov elimizge resmı saparmen kelgen Iordanııa Hashemıttik Koroldiginiń Premer-mınıstri Samır Zaıd ál-Rıfaımen kezdesip, kelissózder júrgizildi. Kezdesýden keıin taraptar BAQ ókilderimen brıfıng ótkizdi. Osyǵan oraı «Egemen Qazaqstan» gazetinde «Yqpaldastyq arta bermek» degen taqyryppen maqala basyldy. «Elimiz úshin Iordanııa arab aımaǵyndaǵy mańyzdy strategııalyq áriptes sanalady, Samır Zaıd ál-Rıfaıdyń bul sapary Qazaqstan men Iordanııa arasyndaǵy yntymaqtastyqty odan ári damytýǵa serpin beretinine senimim kámil, - degen Úkimet basshysy Kárim Másimov kelissózder barysynda eki jaqty yntymaqtastyq máseleleri, onyń ishinde saýda, ekonomıka, ındýstrııa, aýyl sharýashylyǵy, ǵylym, bilim, mádenıet, týrızm, farmatsevtıka jáne ınvestıtsııa salalaryndaǵy yntymaqtastyqty damytý máseleleri talqylanǵanyn da nazardan tys qaldyrmady», dep jazady basylym.

«Egemen Qazaqstan» gazetiniń jazýynsha, Astana qalasynda elimiz Syrty ister mınıstrliginiń Jaýapty hatshysy Rápil Joshybaev pen ıÝNISEF-tiń Qazaqstandaǵy Ókili, BUU-nyń rezıdent-úılestirýshisi Hanaa Sınger "Qazaqstan Respýblıkasynyń Úkimeti men Birikken Ulttar Uıymy arasyndaǵy BUU pasporttary ıelerin vızalyq talaptardan bosatý týraly" kelisimge qol qoıdy. «Vızalyq talaptardan bosatý jónindegi kelisim jasasý BUU-men ózara qarys-qatynasty damytýdaǵy kezekti qadam bolyp tabylady. Sol sebepti Qazaqstan Ulttar Uıymynyń adamzattyń ómirlik problemalaryn sheshýdegi jetekshi rólin túısine otyryp, BUU-men yntymaqtastyqqa úlken mán berip otyr. "Bul uıym - álemdegi eń bedeldi uıym. Sondyqtan, osyndaı kelisimderge qol qoıý arqyly áriptestigimizdi odan ári nyǵaıtýǵa jol ashylady degen oıdamyz», depti Rápil Joshybaev.

Keshe elordada Baılanys jáne aqparat mınıstrliginiń qoldaýymen qazaqstandyq ІT kompanııalardyń ІІ sezi bolyp ótti. Sezge Premer-Mınıstr Kárim Másimov, Baılanys jáne aqparat mınıstri Asqar Jumaǵalıev, Májilis depýtattary qatysty. Shara barysynda Qazaqstandaǵy ІT salasynyń damýyn talqylaý jáne ІT bıznesti yntalandyrý men alǵa jyljytýǵa memlekettik qoldaý kórsetý máseleleri sóz boldy. Osy alqaly jıyndy nazarynan tys qaldyrmaǵan «Egemen Qazaqstan» gazeti búgingi nómirinde «Atqarylar ister atqarylǵannan kóbirek» degen taqyryppen maqala basty. Basylymnyń jazýynsha, aldaǵy 3-4 jylda ІT tehnologııasy mamandaryn jetildirý, kóbeıtý maqsatymen sapaly kadrlar daıyndaıtyn 3 kolledj ashylmaq. Óıtkeni, jalpy alǵanda joǵary bilim alý jaqsy, degenmen kásiptik mamandyqtardy da umytpaǵan abzal. Oǵan sebep, olar joǵary tehnologııalar óndirisin jolǵa qoıyp, olardy jınaýmen, jasaqtaýmen, qurastyrýmen aınalysatyn bolady. Budan ózge, memleket jyl saıyn osy sala mamandyqtaryn daıyndaıtyn JOO-larǵa granttar bóledi.

***

«Alash aınasy» gazetiniń búgingi senbilik sanyndaǵy bas maqala «Kók baıraqpen qoqys tasyǵan qazaq qaıda barady?» degen taqyryppen berilgen. Onda elimizdiń oqý oryndarynyń birinde júrgizilgen senbilik kezinde stýdentter memlekettik týymyzdy qoqys tasıtyn quralǵa aınaldyrǵandyǵy týraly qynjyla jazylǵan. Buǵan ǵalamtordaǵy saıttardyń birinde osy bir soraqy kórinistiń beınejazbasy jarııalanýy túrtki bolǵan. Osy jaıtty shyryldap jazǵan «Alash aınasy» «týǵan eliniń qasıetti Týyn aıaqasty etip qorlap jáne sol áreketiniń sonshalyqty nadandyq ekenin sezinýge óresi jetpeı júrgenderdiń joǵarydaǵy áreketin basqasha baǵalaý múmkin emes» dep oı túıedi.

Gazette sondaı-aq elimizdiń munaıly ólkesindegi ekologııalyq problemalardyń áli de sheshimin tappaı jatqandyǵyn tilge tıek etken «Jaıyqtyń sýalǵany - Atyraýdyń qýarǵany» dep atalatyn syn maqala jaryq kórgen. Ǵalymdardyń pikirinshe, qazirgi kúni Atyraý jeriniń 75 paıyzynyń sory shyǵyp, kishkentaı ózen-kólder tartylyp bara jatqan kórinedi. Al bul máselege tıisti oryndar beı-jaı qarap otyr. Mamandardyń aıtýynsha, osy óńirdegi eń úlken Jaıyq ózeniniń sýy da sarqyla bastapty. Sebebi osy alyp ózenniń boıynda ornalasqan kórshi memleketter Jaıyq sýyn ysyrappen paıdalanatyn kórinedi. Maqala osy problemaǵa nazar aýdartady.

Al «Alash aınasy» gazetiniń «Dat» aıdarynda Almaty qalalyq Jol polıtsııasy basqarmasynyń bastyǵy, polıtsııa polkovnıgi Arman Sarbasovpen keń kólemdi suhbat berilgen. Suhbatta alyp megapolıstiń kólikteri sapyrylysqan kóshelerindegi tártip máselesi sóz bolǵan. «Alash aınasy» arqyly avtokólik ıelerin jol erejelerin saqtaýǵa shaqyrǵan Almatynyń bas polıtseıi Arman Sarbasov zań buzýshylar jazadan jaltaryp kete almaıtyndyǵyn taǵy bir eskertip ótti.

Sonymen qatar osy basylymnyń «Oı-kókpar» aıdarynda «Halyq ártisi» degen ataqty qaıta qalpyna keltirý qajet pe?» degen saýal talqyǵa salynypty. Ondaǵy pikirtalastarda ne aıtylǵanyn bilgińiz kelse, «Alash aınasy» gazetinen kóz jazyp qalmańyz.

***

«Valıýt-Tranzıt Bank» AQ-tyń burynǵy basshysy Aıtbaqy Bılıalovqa qatysty jańa qylmystyq isti tergeý aıaqtalyp, is sotqa jiberildi», dep jazady «Aıqyn» gazeti senbilik nómirinde jaryq kórgen «Bılıalov birneshe bap boıynsha sottalýy múmkin» degen maqalada. Bul jaıynda basylymǵa Qaraǵandy oblystyq prokýratýrasy habarlaǵan. «Shyn máninde, san myńdaǵan salymshylardy san soqtyryp, olardyń jıǵan-tergen salymdaryn qaqshyp ketken «Valıýt-Tranzıt Banktiń» burynǵy basshysy Aıtbaqy Bılıalov pen onyń sybaılastarynyń qarjy álemindegi qylmystyq isine núkte qoıylýǵa jaqyn deýge bolady. Bul isti tergeý isiniń ońaı bolmaǵany anyq. Desek te, Bas prokýratýranyń arnaıy prokýrory M.Bektursynov jetekshilik etken tergeý tobynyń muqııat júrgizgen tergeý-tekserý amaldary barysynda, yqpaldy bank tobynyń kóp jyldar boıǵy qylmystyq is-áreketteri tolyq áshkerelendi. Sóıtip, Bılıalovtyń basqarýyndaǵy qylmystyq toptyń óreskel zań buzýshylyǵy jaǵdaıynda jalpy somasy 30 mıllıard teńgeden astam qarjynyń qoldy bolǵany tolyq anyqtaldy», dep jazady basylym.

Osy basylymnyń dástúrli «Aq sóıle!» aıdarynyń búgingi qonaǵy - Qazaqstan Jazýshylar odaǵy basqarmasynyń tóraǵasy Nurlan Orazalınmen ardaǵy suhbat «Eldik tutastyǵymyzdy saqtaýdyń úlken mektebi - kórkem ádebıet» degen taqyryppen basylǵan. Basylymnyń barlyq saýaldaryna egjeı-tegjeıli jaýap bergen ol «Táýelsizdikpen birge jańa bir qubylys bizdiń ómirimizge jarysa kirdi. Ol - jahandaný degen nárse. Jahandaný endi-endi táltirektep, etegine súrinip-qabynyp, kóziniń jasyn jańa súrtip jatqan sol kezdegi bizdiń ómirimizge qosa-qabat enip ketti. Bul da - óziniń arjaǵynda úlken maqsaty bar nárse. Keshegi «dúnıeni bólshekte de, bıleı berdiń», tizgindeýdiń, ǵalamnyń tórt buryshyn typyr etkizbeı ustaýdyń jıyrmasynshy ǵasyrda úlken-úlken mektepteri boldy ǵoı. Men jahandanýdy adamzat balasy aınalyp óte almaıtyndaı etip jasalǵan sonyń jańa bir úlgisi dep esepteımin. Sondyqtan jahandanýdyń kúngeı jaqtary da bar, kóleńkeli tustary da kóp» degen pikirin bildirgen.

El ishinde sportty jasynan janyna serik etip, jyldar aǵymynda jınaǵan tájirıbesin keıingi býyn ókilderimen bólisip, balalarǵa ónege etip júrgenderi de barshylyq. Sondaı azamattyń biri, «áýesqoı» sportshy - Berik Pyshanov. Talas aýdanynyń ortalyǵy Qarataý qalasynda eńbek etip júrgen Berikti jerlesteri «qurysh qulaqty Berik» dep te ataıdy. Onyń ózindik sebebi de bar. bul sebepti bilgińiz kelse, «Aıqyn» gazetiniń senbilik nómirinde jarııalanǵan «Qulaǵymen kólik tartqan jigit» degen maqalany jiberip almańyz.

***

«Kazahstanskaıa pravda» gazetiniń jazýynsha, keshe elimizge velosporttan birneshe márte rekordtar jasaǵan, kóp kúnge sozylatyn úsh iri jarysta 11 ret jeńiske jetken Eddı Merks, "Týr de Frans" báıgesiniń úsh dúrkin, "Djıro d Italııa", "Výelta Ispanııa" jarystarynyń jeńimpazy Alberto Kontador men otandasymyz, «Astana» veloklýbynyń qazirgi kapıtany Aleksandr Vınokýrov keldi. Osyǵan oraı ótken arnaıy baspasóz máslıhaty barysynda A.Vınokýrov «"Týr de Frans" kópkúndik báıgesinde komandalyq esepte alǵashqy oryn alýǵa umtylamyz. Alberto ketkenimen, jas, bolashaǵy zor Roman Kroıtsıger keldi. Qazaqstandyq jastar ósip keledi», degen.