Eldigimiz - birlikte
ASTANA. 29 qańtar. QazAqparat. Elbasymyz N.Á. Nazarbaevtyń «Bolashaqtyń irgesin birge qalaımyz» degen Qazaqstan halqyna bıylǵy Joldaýyn teledıdardan kórip, úlken tolǵanysqa túskenimdi jasyra almaımyn,
deıdi Jambyl atyndaǵy Memlekettik fılarmonııanyń bas dırektory, Qazaqstannyń eńbek sińirgen artısi, professor Muhtar Óteýov.
Otandyq óner salasynyń 30 jyldan astam qyzmet jasap kele jatqan baıyrǵy qyzmetkeri retinde tuńǵysh Prezıdentimizdiń táýelsiz derbes memleketimizdiń irgetasyn qalap, shańyraǵyn kótergen sátteri anyq esimde. Ásirese kásibı mádenıetimiz ben ónerimiz úshin 90-shy jyldardyń meıilinshe aýyr da kúrdeli bolǵany áriptesterimniń qaperinde bolar. Memleket basshysynyń «El kóshin bastaý - maǵan syn, meni qostaý - elge syn», - degen sózine boı urǵan bizder, óner qaıratkerleri, bir kisideı jumylyp, barlyq qıyndyqty jeńe bildik. Elbasynyń shynaıy qamqorlyǵynyń arqasynda respýblıkada birde bir óner mekemesi jabylǵan, qyzmetkerleri qysqartylýǵa túsken joq. Kerisinshe, qatarymyz keńeıdi, kóbeıdi: memleket basshysynyń arnaıy Jarlyǵymen 2000-shi jyl «Mádenıet jyly» atalyp, Astana qalasynda Kúlásh Baıseıitova atyndaǵy Ulttyq opera jáne balet teatry, onyń aldynda Ulttyq óner ýnıversıteti qurylyp, ekinshisi jaqynda ǵajaıyp arhıtektýraly jańa ǵımarqa kirse, Ulttyq opera teatryna búgingi kúnniń suranysyna saı arnaıy shańyraq-saraı salynýda. Bizdiń aldymyzda Elbasynyń artqan úmitin aqtap, jahandanýdyń álemdik básekelestik keńistiginde ulttyq mádenıet pen ónerimizdi abyroımen kórsete bilý mindeti tur. Mine, osy turǵyda, óner qaıratkerlerimizdiń sheberligi talǵamy kúshti shet eldik kórermenderge aspandy shaqqan naızaǵaıdaı áser etip jatsa, olardyń ishinde Jambyl atyndaǵy memlekettik fılarmonııasynyń ujymy men jeke oryndaýshylarynyń bar ekenin men zor maqtanyshpen aıta alamyn.
Qyzmet babymen óner delegatsııalarynyń quramynda kóptegen shet elderde bolǵan kezderimde, Qazaqstan degende báriniń aýzynda Nursultan Nazarbaevtyń esimi turatynyn, Prezıdentimizdiń ol jaqta keńinen tanymal harızmaly tulǵa ekenine kózim anyq jetti.
Elbasymyzdy tórtkúl dúnıe tanyp otyrǵany - búgingi kúnniń úlken shyndyǵy. Qyran qanat Qazaqstannyń budan da bıik, budan da asqaq samǵaýy tur alda. Prezıdent Joldaýynda elimizdi jan-jaqty ındýstrııalandyrý máselesi kóterilip, materıaldyq damýymyzdyń basty kúshi - ekonomıkaǵa basa nazar aýdarylǵan eken. Halyqtyń turmysy jaqsaryp, materıaldyq múmkindigi molaısa, onyń mádenı-rýhanı suranysy da keńeıip, tereńdep, teatr, kontserttik zaldardyń kórermenderi kóbeıeri sózsiz. Olaı bolsa, dana oıly, sergek boıly, týǵan halqyna berer syıy áli mol Tuńǵysh Prezıdenttiń ókilettigin 2020 jylǵa deıin uzartý referendýmyn ótkizýge Jambyl atyndaǵy qazaq memlekettik fılarmonııasynyń ujymy bir kisideı qoldady. Osyǵan oraı, júrek sezimimniń syryn ashar Tóle bı babamyzdyń myna óleń joldaryn aıtqym keledi:
«Astyńa berse altyn taq,
Elińniń saǵan sengeni.
Bereke-bitim jolyn tap,
Kúshtiń betin basta - dep,
Qolyńa tizgin bergeni!»
