Eldi-jerdi jaýdan qorǵap qalǵan batyr babalarymyzdy áli tolyq tanyp bolǵan joqpyz
ALMATY. 10 jeltoqsan. QazAqparat /Erlik Erjanuly/ - Batyr babalarymyzdyń qaharmandyq erlikteri men ónegeli isterin jas urpaqqa nasıhattaý óz deńgeıinde emes.
Bul jaıly búgin Almatyda ótken "Qazaqtyń Uly qolbasshylary" dep atalatyn respýblıkalyq ǵylymı-tájirıbelik konferentsııada aıtyldy.
"Elimizdiń bas qalalary men oblys ortalyqtaryndaǵy murajaılardan eldi-jerdi qorǵap qalǵan batyr-babalarymyzǵa arnaıy bólmeler ashý kerek. Eksponattar men materıaldardy jınaýdy mektep muǵalimderi arqyly júzege asyrýǵa bolady. Qala, aýdan men aýyldarǵa jáne ondaǵy kóshelerge el men jerdi jaýdan qorǵap qalǵan batyrlardyń esimderi berilse. Sondaı-aq sport mektepteri áskerı qurylymdar, shekara zastavalary olardyń esimderimen atalyp, eskertkishter men monýmentter ornatylsa. Derekti-kórkem fılmder, kórkem shyǵarmalar men ǵylymı zertteýler jazylsa. Barlyq joǵary oqý oryndarynda zertteý jumystary júrgizilip, ony jer-jerde basyp shyǵaratyn bolsaq, búkil elimiz boıynsha asa qundy derekter qory jınalar edi", - deıdi Qorqyt ata atyndaǵy Qyzylorda memlekettik ýnıversıteti janyndaǵy "Qorqyttaný" ǵylymı-zertteý ınstıtýtynyń dırektory, fılolgııa ǵylymynyń doktory Baǵdat Kárbozuly.
Onyń paıymdaýynsha, bul jáıttardyń qalaı júzege asyp jatqanyn talqylap, jetildirý úshin bul respýblıkalyq konferentsııany dástúri sharaǵa aınaldyrý kerek. Sonymen qatar ondaǵy baıandamalardy jınaq etip bastyryp shyǵaryp, zertteýshiler men qalyń oqyrman qaýymnyń talqysyna salý qajet.
