Eldi mekenderdiń sý tasqynyna daıyn emestigi týraly 346 eskertý berildi

NUR-SULTAN. QazAqparat – Eldi mekenderdiń sý tasqynyna daıyn emestigi týraly 346 eskertý berildi. Bul týraly Senattyń jalpy otyrysynda QR Tótenshe jaǵdaılar mınıstri ıÝrıı Ilın málim etti, dep habarlaıdy QazAqparat tilshisi.

«Bıyl óńirlerdiń sý tasqynyna daıyndyǵyn Prezıdent Ákimshiligi men Qaýipsizdik keńesiniń, aýdandar men aýyldyq okrýgterdiń jergilikti atqarýshy organdarynyń komıssııalary, Tótenshe jaǵdaılar mınıstrligi mamandary tekserdi. Eldi mekenderdiń sý tasqynyna daıyn emestigi týraly 346 eskertý berildi, onyń 304-i joıyldy. Sý tasqyny kezeńine daıyn emestigi týraly eskertý berýdiń negizgi sebepteri - qardyń ýaqtyly shyǵarylmaýy, sý ótkizý qurylystarynyń jetkiliksiz tazalanýy, ınertti materıaldar qorynyń daıyn bolmaýy», - dedi ıÝ. Ilın.

Onyń aıtýynsha, jol kartasyn iske asyrý boıynsha qabyldanyp jatqan sharalarǵa qaramastan, jergilikti atqarýshy organdardyń sý tasqynyna qarsy aldyn alý is-sharalaryn jergilikti bıýdjet esebinen qarjylandyrý máselesin elemeý faktileri oryn alyp otyr.

«Ótken jyly 2,2 mlrd teńge somasyna 37 is-shara ǵana iske asyryldy, 22 shara iske asyrylmaı qaldy. Sońǵy bes jylda (jol kartasyn iske asyrý kezeńinde) eldi mekenderdi sý basý sebepterine júrgizilgen taldaý aldyn alý jumystary aıaqtalǵan eldi mekenderdi sý baspaıtynyn nemese olarda sý basý barynsha azaıǵanyn kórsetedi. Eldi mekenderdi sý tasqynyna qarsy qorǵaýdy qamtamasyz etý kezinde tap bolyp otyrǵan problemalardyń biri - turǵyn úılerdiń sý qorǵaý aımaqtary men beldeýlerinde ornalasýy, sondaı-aq osy aýmaqtarda úı salýdyń jalǵasyp jatqanynda», - dedi mınıstr.

Budan buryn habarlanǵandaı, Qazaqstanda 285 eldi mekende sý tasqyny qaýpi saqtalyp otyr.