Eldi mekenderdiń mańyndaǵy jaıylymdar aýyl turǵyndaryna qaıtarylady
ASTANA. QazAqparat - Parlament Májilisiniń jalpy otyrysynda QR Premer- Mınıstriniń orynbasary - Aýyl sharýashylyǵy mınıstri Asqar Myrzahmetov aýyl mańyndaǵy jaıylym alańdaryn aıqyndaıtynyn málim etti, dep habarlaıdy QazAqparat.
«Zań jobasymen jergilikti turǵyndardyń aýla malyna jaıylym jetispeýshiligin sheshý maqsatynda eldi mekender aınalasynda jaıylym alańdaryn aıqyndaıtyn norma kózdelýde. Osy maqsatta aıqyndalǵan jaıylymdardy Qazaqstan Respýblıkasynyń jeke jáne zańdy tulǵalaryna jalǵa berýge tyıym salynatyn bolady. Búgingi kúni eldi mekenderdiń mańyndaǵy jaıylymdardyń kóbi jeke jáne zańdy tulǵalarǵa berilip ketkendigin eskerip, ákimdikterge ol jerlerdi qaıtarý úshin memlekettik muqtajǵa jatqyzý quqyǵy berilip otyr», - dedi A. Myrzahmetov jer qatynastaryn retteý zań jobasy boıynsha baıandamasynda.
Belgili bolǵandaı, jalpy zań jobasymen Jer jáne Ákimshilik quqyq buzýshylyq Kodeksterine, «Jer kodeksiniń jekelegen normalarynyń qoldanysyn jáne 2015 jylǵy 2 qarashadaǵy Zańynyń qoldanysqa engizilýin toqtata turý týraly» jáne «Qoǵamdyq keńester týraly» Zańdarǵa túzetýler engiziledi. Zań jobasynyń keıbir normalary respýblıkalyq bıýdjettiń shyǵystarynyń ulǵaıtady, olardyń barlyǵy RBK da qaralyp, qoldaý tapty.
«Qujat aýyl sharýashylyǵy maqsatyndaǵy jerlerdi jalǵa berýdiń jańa joldaryn belgileı otyryp, olardy tıimdi paıdalanýǵa baǵyttalǵan. Qaralyp otyrǵan jańa normalar jergilikti atqarýshy organdar qyzmetiniń jarııaly bolýyna yqpal etedi, sondaı-aq jerlerdi berý júıelerin aqparattandyrýǵa jáne qoǵamdyq pikirdiń keńinen eskerilýin kózdeıdi», - dep túıindedi sózin Asqar Myrzahmetov.
Aıta keteıik, Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine jer qatynastaryn retteý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldady.
