Eldi mekenderdi belgili tulǵanyń esimimen ataý ol qaıtys bolǵan kúnnen 5 jyl ótken soń ǵana múmkin bolady - zań jobasy
ASTANA. 12 jeltoqsan. QazAqparat - Ataýdy ózgertý týraly sheshim ábden pisip jetilgen, ýaqyt synynan ótken bolýy qajet.
Búgin QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine onomastıka máseleleri boıynsha ózgerister men tolyqtyrýlar engizý týraly» zań jobasy jóninde baıandaǵan QR Mádenıet jáne aqparat mınıstri Darhan Myńbaı osylaı málim etti.
Mınıstrdiń aıtýynsha, zań jobasymen bir ákimshilik aýmaqtyq birliktiń shegindegi eldi mekenderge jáne eldi mekenderdiń quramdas bólikterine bir ataýdy bir retten artyq bermeý kózdeledi.
«Rasynda, bir aýdanda birdeı atalatyn birneshe aýyldyń bolýy orynsyz, ártúrli tótenshe jaǵdaılarda, ózge de oqıǵalarda qaýipti ári yńǵaısyz ekeni bárimizge túsinikti dep oılaımyn. Budan bólek, jeke adamnyń esimi berilgen, ózgertilgen nysan ataýyn ózgertý qajettigi týyndaǵan jaǵdaıda, bunyń tek on jyl ótken soń qaıta ózgertýge bolatyny kórsetilip, kórnekti memleket, qoǵam jáne ǵylym qaıratkerleriniń, Qazaqstan men álemdik qoǵamdastyq aldynda eńbegi sińgen basqa da jeke tulǵalardyń esimin olar qaıtys bolǵan kúnnen bastap, keminde 5 jyl ótkennen soń ǵana berý usynylady», - deıdi Darhan Myńbaı.
Bul rette mınıstrdiń aıtýynsha, ataýdy ózgertý týraly sheshim ábden pisip jetilgen, ýaqyt synynan ótken bolýy qajet. «Sosyn jergilikti bıliktiń jaǵdaıyna qarap ataý ózgermeýi tıis», - dedi D. Myńbaı.
